Kangaatsiami suliffissaaleqisoqarnerpaavoq

Kangaatsiaq suliffissaaleqiffiunerpaatut siorna inissisimasimavoq siornalu upernariartornerani Kangaatsiami eqqaanilu Pilersuisup niuertarfii annikinnerujussuarmik isertitaqarsimapput.

Tassa februaarimiit aasaq tikillugu appariartuinnartumik isertitaqarsimagamik, ukiariartorneranili isertitat kusattikkiartoqqissimapput taamaallaat nunaqarfik ataaseq pinnani. Kangaatsiami niuertoq Jakob Enoksen ima nassuiaateqarpoq:

- Tassa Attu paasiniaaffigigakku nakkariarsimavoq 2 millioningajaat budgetinit. Attu nunaqarfinni nakkariartornerpaatut isikkoqarpoq, oqarpoq.

Attumi Pilersuisoq januaarimi isertitatigut ingerlalluarsimavoq. Suna peqqutaasoraajuk?

- Tassa meeqqanut checkit tassani aallaaviupput, Jakob Enoksen nassuiaavoq.

Meeqqat ataasiakkaat 3.000 koruuninik januaarip aallartilaarnerani tigusisinnaanngornerat Kangaatsiami innuttaasut aningaasaqarnerulernerannik kinguneqarsimasoq, Jakob Enoksen oqarpoq.

Kangaatsiami 190-nik meeraqarfiusumi januaarip sisamaanni tallimaannilu Pilersuisup 228.000 kronet isertissimavai, tassa meeqqanut tunniunneqartut affarluinnaat ulluni marlunni nungunneqarsimallutik. Ingammillu nerisassanut atorluarneqarsimasut Jakob Enoksenip oqaatigaa.

Arctic Green Food Attumi tallimanik ukiuutillugu sulisoqartaraluartup matoqqanera innuttaasuat isertitakinneruneranut aamma pissutaavoq.

Sooq-una Attumi Pilersuisup pisiniarfia isertitakinnerpaajunersoq?

- Immaqa oqarsinnaavugut Attu pisiniarfeeqqanik unammillerteqarnerpaajusoq, Kangaatsiammi kommuneqarfigisimasaani pisiniarfeeqqanik pingasunik unammillerteqarpoq. Aamma tunitsiveqannginnerat immaqa sivisunersaanikuulluni taakkua peqqutaalluarsinnaapput, Kangaatsiami Pilersuisumi niuertoq Jakob Enoksen nassuiaavoq.