Kangaatsiami siorna aasaanerani panernerata Nukissiorfiit imeqarfia imaarutsingajakkaa
- Kangaatsiami siorna aasaanerani panernarpoq imeqarfillu maanna ukiuunerani imaarutingajaqqalluni, Nukissiorfiit tusagassiuutinut taama nalunaaruteqarput.
Nukissiorfiit tusagassiuutinut taama nalunaaruteqarpoq.
Kangaatsiarmiut imermik naammattumik pilersorneqarnissaat anguniarlugu, Royal Greenlandip fabrikkianut imermik pilersuisoqarunnaarpoq, fabrikkilu marsip ulluisa arfernani matuneqarluni.
Innuttaasulli imermik ukiut tamaasa killilimmik pilersuinerup ajornartorsiutaajuarnera qatsulluinnarpaat.
- Silagittaqattaarpoq sikoqarpiaranilu, aalisarnerlu aallartingajalerluni, fabrikkilli piffissami matumani matoqqanera aporfiuvoq, Kommune Qeqertalimmi, Inuit Ataqatigiit sinnerlugit kommunalbestyrelsimi ilaasortaq, Hans Aronsen KNR-imut oqaluttuarpoq.
Taamaattumik aalisartut piniartullu peqatigiiffiata, KNAPP-ip, ilaasortani, kommunimiit, Royal Greenlandimit Nukissiorfinniillu sinniisut aggersarpai. Ataatsimoorussamillu allagaqarlutik.
Ataatsimoorluni aaqqinissaq ujartorneqartoq
Naalakkersuisut Kommune Qeqertalik suleqatigalugu ataatsimoorussamik aaqqiissuteqarnissaq kissaatigaarput, naalakkersuisummi imeqarnermut tunngasut akisussaaffigaat, Kommune Qeqertalimmi, kommunalbestyrelsimi ilaasortaq, Hans Aronsen oqarpoq.
Kangaatsiami tunisinerup ingerlaannarnissaa anguniarlugu, Naalakkersuisut Royal Greenlandimut umiarsuarmik tunitsiviliinissamut piumasaqassasut, Hans Aronsenip piumasaraa.
- Tunitsiviliinissaq nunaqqataasugut pisariaqartipparput, Hans Aronsen oqarpoq.
Nukissiorfiit tusagassiuutinut nalunaarutigaat, nipisat suaannik majimi tunisassiornissamut imermik atugassamik utaqqiisaagallartumik pilersuisinnaanissaq siunertaralugu, Nukissiorfiit fabrikkillu akunnerminni oqaloqatigiittut.
- Utaqqiissaagallartumik pilersuinissarput pillugu erseqqinnerusumik marsip ulluisa 13-iat nallertinnagu paasissutisseeqqissinnaassalluta naatsorsuutigaarput, Nukissiorfiit taama nalunaaruteqarpoq.
Kangaatsiami fabrikkip ammanerani inuit 40-t missaanniittut sulisinneqartarput, fabrikkimullu imermik pilersuisoqarunnaarmat inuit arfineq pingasut taamaallaat maanna sulisinneqarlutik.
