Kangaatsiami qaammat ataaseq kommunefoged-qanngilaq

Allattoq Carla Davidsen
juulip 28-at 2005 16:11

Kangaatsiami qaammat ataaseq kommunefoged-eqarsimannginneq innuttaasunut toqqissisimanngissutaavoq.

Kangaatsiap illoqarfiani 700-t missaanni inulimmi kommunefoged-it pingasut ataatsikkungajak qaammat ataaseq qaangiummat soraarniuteqarput. Ulloq manna tikillugu taartissaannik suli qinnuteqartoqarsimanngilaq, Kangaatsiamilu borgmesterip Otto Jerimiassen-ip pisoq ilungersunartutut isigaa.

-Soorunami illoqarfimmut 700-t tungaanut inoqartumut taamatut inissisimalerneq toqqissisimananngilaq. Innuttaasut ataasiakkaat eqqarsaatigissagaanni atorfissaqartitsinertillu toqqammavigalugu kommunimut saaffiginnittarnermikkut ilaatigut amigaateqarnertik tamatumani ersersittarpaat, Otto Jerimiassen oqarpoq.

Innuttaasullumi kommunefoged-imik pisariaqartitsileraangamik Aasiannut sianertartut Otto Jerimiassen-p oqaatigaa.

-Soorunami allatut iliuutsit atorsinnaasagut atortarpagut, tassa toqqaannarlugu Aasiannut politiinut unnerluussisinnaanerit allatut ajornartumik atorneqartariaqartarmata. Tamannalu politiit nalilersuinertik toqqammavigalugu suliassaq qanoq nukinginnartiginersoq iliuuseqarfigisaraat nalunngilara. Suliassarlu nukingernaraluartoq allatut ajornartumik Kangaatsiap kommuneqarfianut angalanissaminnut utaqqisittaraat aamma nalunngilara, Otto Jerimiassen oqarpoq.

Otto Jerimiassen-ip qularutiginngilaa kommunefoged-it suliaat tunngavigalugit sulinermikkut akissaataasa appassinnerujussuat peqqutaalluni kommunefoged-itut atorfiit suli qinnutigineqarsimanngitsut.

Otto Jerimiassen-ip inatsisartuni aamma ilaasortaasup ukioq kingulleq inatsisartuni apeqquteqaatigigaluarpaa kommunefoged-it akissaataat qaqugu pitsanngorsarneqassanersut Kangaatsiamilu politeeqalersinnaanerannut tunngasumik aamma apeqquteqaateqarluni.

Kangaatsiap illoqarfia 700-it missaanni inoqarpoq, kommunilu tamakkerlugu 1500-t missaanni inoqarluni. Kangaatsiaq sisamanik nunaqarfeqarpoq.