Kangaatsiami peqqissaavik matoqqasarpoq

Kangaatsiami peqqissaavik sapaatit akunnerisa naanerini matoqqasarpoq. Peqqissaaviup matoqqanerata nalaani peruluttoqalissagaluarpat tamanna assut ernumanartoq Kangaatsiarmiut ullaaq Iterluarnaami oqarput. Peqqissaaviup matoqqasarnera sulinermut isumaqatigiissutinik sulisussaaleqinermillu pissuteqartoq Aasiaat napparsimmavianni peqqissaasut ningiuat Inuuti Fleischer oqarpoq:

- Sinerissami peqqissaaviit qullersaqarfiannit upernaaq piumaffigineqarpugut nunaqarfinni sulisugut illersussagutsigit isumaqatigiissutit atuuttut malittariaqarivut.

Sulinermut isumaqatigissut naapertorlugu nunarfinni sulisut upalungaarsimasussaanngillat, allannguineq tamanna Kangaatsiami juulip aallaqqaataaniit atulerpoq. Kangaatsiarmiut sapaatit akunnerisa naanerini perululerunik Aasianni napparsimmavimmut saaffiginnittassapput. Peruluttoqarnera pissutigalugu Aasianniit Kangaatsiamukartitsinerit angallat sukkasuuliaq atorlugu pisassapput. Angallammik sukkasuuliamik Kangaatsiaq akunnerup iluani tikinneqarsinnaasoq Inuuti Fleischer oqarpoq. Kangaatsiami peqqissaavimmi sulisoq oqarsuaateqartinneqarpoq angallattakkamik, sulinermi avataani saaffigineqarsinnaalluni, oqarasuaatinili matoqqatippagu, allatut ajornassaaq, sulisoq isumaqatigiissutit malillugit upalungaarsimasussaatitaanngimmat.

Kangaatsiaq oktobarip aqqarnaniit peqqissaasoqalissasoq Inuuti Fleischer ilisimatitsivoq, erseqqissaatigaali Kangaatsiami peqqissaasoqaleraluarpalluunniit peqqissaavik sapaatit akunnerini matoqqasassasoq.