Kangaatsiami Kullorsuarmilu meeqqat inuunerissut

Kangaatsiami Kullorsuarmilu 6. klassimi atuartut peqatigiiffiup Meeqqat Inuunerissut unammisitsinerani, meeqqat qanoq inuunerinnissaannik titartaanermi oqaasertaliinermilu, ajugaasuupput.
apriilip 24-at 2009 08:56

Taakkunani atuarfinni marlunni atuartut titartakkanik kusanarluinnartunik taallanillu nuannersunik nassiussillutik unammisitsinermi peqataapput. Unammisitsinermi nuna tamakkerlugu atuartut peqataapput. Atuaqatigiit ilaat allagartarsualiorsimapput, allallu aviiseeraliorsimallutik.

- Nassiussarsiatsinni tamani erserpoq, inuunerissuunissamut suut pisariaqartinneqarnersut pillugit isummatik piffissaqarfigilluarlugu meeqqat takutikkusussimagaat, peqatigiiffimmit allapput.

Titartakkat unammisitsinermi nassiunneqartut ilaat maanna postkortinngorlugit peqatigiiffiup saqqummersinniarpai. Taamaalilluni meeqqat inuunerissuunissamut oqariartuutaat inuit amerlanerusut takusinnaaniassammatigik.

Tamatuma saniatigut meeqqat nassiussaat meeqqanik sullissisunit allanillu soqutiginnittunit isumassarsiorfissatut quppersaganngorlugit saqqummersinneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq