Kangaatsiami imissaaleqinerup kinguneranit sulisut angerlartinneqarput

Kangaatsiami imissaaleqinerup kingunerisaanik Royal Greenlandip tunisassiorfiani sulisut 20-it angerlartiinnarneqarput.
oktobarip 28-at 2015 12:06

Kangaatsiami imissaaleqineq innutaasunut malunniuteqarunnanngitsoq, Nukissiorfiup nalunaarutigaa. 

Royal Greenlandilli tunisassiorfiani imermik sipaassapput.

Taamaammat suliffeqarfik sulisunik angerlartitsiinnartariaqalerpoq, tamannalu Royal Greenlandip Kangaatsiami tunisassiorfianiit ajuusaarutigineqarpoq.

- 20-t misserpiaani angerlartikkallarnikuuagut tisajunnaarnerput pissutigalugu, Kangaatsiami Royal Greenlandip tunisassiorfiani aqutsisoq Abia Thorsteinsen oqarpoq.

Aamma atuaruk Kangaatsiap imermik pilersornerunissaa pilersaarutigineqanngitsoq

Tunisassiorfik imermik sipaassasoq Nukissiorfiup Royal Greenlandillu oktobarip arfineq pingajuanni ataatsimiinnerminni isumaqatigiissutigaat. Sapaatip akunneranut 450.000 literi atorneqartaraluartoq atuineq 30.000 literiinnangortinneqarluni.

Taamaammat sulisut 20-t aqaguani angerlartinneqarput.

- Allatut ajornartumik Nukissiorfiup imermik atueqqusinnginnera aallaavigalugu taakkua angerlarsimatiinnartariaqarpagut. Imermik atuisinnaanngorteqqippatigut saarulleqassusialu apeqqutaalluni taava suliartoqqoqqinneqarumaarput, Abia Thorsteinsen oqarpoq.

Aamma atuaruk KAPP: Kangaatsiami imeerunnissaq ernumanarpoq

Tunisassiorfimmi saarullinnik tisasoqartaraluartoq imissaaleqinerup kingunerisaanik ilivitsuutillugit qeritiinnarneqartariaqalerput, taamaalilluni sulisut ikinnerusut pisariaqartinneqalerlutik.

Tamanna ajuusaarnartuusoq tunisassiorfiup aqutsisuata oqaatigaa.

- Oqaatigiinnassavara ajuusaarnartorujussuummat imermik amigaateqarneq pissutigalugu saarullineruttorfiata nalaani sulisunik angerlartitsiinnartariaqarsimagatta, Abia Thorsteinsen oqarpoq.

Tatsimut imeqarfiusumut tapertaasussamik erngup aqqutaanik Nukissuiorfiit maanna ikkussuileruttorput. Novembarip naalernerani piareernissaa naatsorsuutigineqartoq, Nukissiorfiup attaveqaqatigiinnermut pisortaata Per Wenzel Krusep KNR-imut oqaatigaa.