Kangaatsiami angallataatiminnik annaasaqartut ikiorserneqarnissamik qinnuteqaateqartut

Taakkunanilu arfineq-marluk aalisariutaatiminnik annaasaqarsimasut, pisortanit ikiorserneqarnissaminnik qinnuteqarsimasut, 25.000 koruunillu angullugit ikiorserneqarsinnaasut, Pollas Lyberthip aalisarnermut naalakkersuisoqarfimmi immikkoortortami pisortap uppernarsarpaa.

- Inuit arfineq-marluk qinnuteqaataat tigunikuuagut taakkualu aallaavigalugit suliaralugit, Pollas Lyberth KNR-imut taama ilisimatitsivoq, oqaatigalugulu qinnuteqartut qinnuteqaataat piffissami qanittumi akineqassasut.
 
25.000 koruunit aalisariutip kivinerani annaasat matussusersinnaanngilaat. Inuillu ataasiakkaat namminneq aalajangertussaavaat atortorissaarutitik sillimmasissanerlugit. Naalakkersuisoqarfimmit oqaatigisinnaanngilaat pineqartut sillimmasersimanersut, taamaattorli ikiorsiinissamut nalilersuinermi tamakku tunngavigineqassasut oqaatigineqarpoq.

AAMMA ATUARUK Kangaatsiami umiatsiat ikinnerpaamik aqqanillit kivipput

- Inuit ataasiakkaat sillimmasersimanersut sillimmasersimannginnersulluunniit imaaliallaannaq takusinnaanngilakka. Kisianni suliaq suliarineqarpoq, taakkualu nalilersuinermi ilanngullugit tunngavigineqartussaapput, Pollas Lyberth taama oqarpoq.
 
Qinnuteqartut ataasiakkaat 25.000 koruunit sinnerlugit aallartisaqqinnissamut taperneqassappata tamanna immikkut akuerineqassasoq, Pollas Lyberth nassuiaavoq.

- Tassani inatsimmi allassimavoq minnerpaamik 2000-inik annerpaamillu 25.000 koruuninik tapiisoqarsinnaasoq. Tassanngalu annerusumik taperneqassappata tamanna Naalakkersuisunit akuerineqaqqaartussaavoq. Taannalu suliaq maanna ingerlavoq,  Aalisarnermut naalakkersuisoqarfimmi immikkoortortami pisortaq Pollas Lyberth taama oqarpoq.
 
Qaasuitsup Kommuniani borgmesteri Ole Dorph anorersuup kingorna aalisartut annaasaqartut ikiorneqarnissaanik kaammattuinikuuvoq. Pilersuisorlu inuussutissanik aamma ikiorsiinikuulluni.