Kangaamiut Seafood pinerluttunik suleqateqarnerarneqarpoq
Danskit aalisakkeriviutaat nunatsinni aallartinneqartoq Kangamiut Seafood A/S svenskit isiginnaagassiaanni russit pinerlunniatartoqatigiivisa aalisariutaannik suleqateqarluni Barentip imartaani unioqqutitsilluni saarullinniartartutut aallakaatitassiarineqarpoq.
Svenskit aallakaatitassiaanni ”Kalla Fakta”-mi Sverige TV4-kkut aallakaatinneqartumi russit aalisariutaat qulingiluat Barentip imartaani saarullittassatik sinnerlugit pisaqarsimasut Kangaamiut Seafoodimit niueqatigineqarsimasut aallakaatitassiarineqarpoq.
Saarullittarineqartut angallatinut qerititsivilinnut nussorneqartarput taamatumalu kingorna Europami umiarsualivinnut, soorlu Hirtshalsimut, eqqunngitsumik allagartalersorlugit eqqussuunneqartarsimapput.
Unioqqutitsillutik aalisartunik suleqateqarneq ajorpugut, Kangaamiut Seafoodimi pisortaaneq, Niels Rasmussen Ritzaumut oqarpoq nangillunilu, russit aalisariutaat pineqartut qulingiluat siusinnerusukkut pisiffigisimagitik aalajangersimasumilli pisiortorfigisarniarlugit isumaqatigiissuteqarfigisimanagit erseqqissaatigaa.
Europami tunisassiorfiit unammillikkagut assigalugit aalisakkanik pisiortortarpugut aamma saarulliup sumi pisarineqarsimanera pappilissallu eqqunngitsumik immersorneqarsimaneri namminneq uppernarsassallugu periarfissaqanngilluinnarpugut, Niels Rasmussen oqarpoq.
- Aalisariutip pisassani tamakkersimanerai imaluunniit aalisariutip allap pisassaanik pisiortortoqarsimanersoq nakkutigisinnaanngilarput. Tamanna ajornarluinnarpoq, Kangamiut Seafood A/S-imi pisortaq oqarpoq nangillunilu Barentip imartaani aalisagartarineqartartut nakkutigineqartarnerisa pitsanngorsarneqarnissaat anguniarlugu kattuffitsik Danmarks Fiskeindustri- og Eksportforening piumasaqarfigisimallugu EU kommissionimi tamanna eqqartorneqartariaqartoq.
Russit aalisariutaasa, aallakaatitassiami sammineqartut, pisarisimasaannik pisiortorunnaarnissartik Niels Rasmussenip ilisimatitsissutigaa.
Kangamiut Seafood A/S 1975-imi pilersinneqartoq, Danmarkimi aalisakkanik tunisassiorfiit annersaannut ilaavoq, Atlantikumilu pisarineqarsimasunik nunanut allanut tunisassiortut annersaannut ilaalluni. Aalisakkanik qalerualinnillu Russinit pisarineqarsimasunik aamma tunisassiortuuvoq.
