Kampusch illusiniarluni aalajangersimavoq
Natascha Kampusch ukiuni arfineq-pingasuni aallarussaaqqareerluni ilaquttaminut siorna uteqqittoq, aallarussisumi illugisimasaa maanna pisiarinialerpaa. Aviisi Berlingske Tidende-mi tamanna atuarneqarsinnaavoq.
Natascha Kampusch-ip misigisimasani pillugit tusagassiutinut assigiinngitsunut oqaluttuarisarsimavai, oqaluttuanilu 36 millioni koruunit missaannik aningaasarsissutigisimallugit.
Aningaasarsiami ilai illusissutiginiarpai. Tassa illu tigummineqarfigisimasani pisiariniarlugu aalajangersimagami.
- Illu takornariartarfittut atorneqalinnginnissaa anguniarlugu, namminerlu najornissaa pinngikkaluarlugu illu pisiarniarpaa, Natascha Kampuschip eqqartuussissuserisua Østrigimi tv-qarfiit ilaannut oqarpoq.
Natascha Kampusch qulinik ukioqarluni Wolfgang Priklopil-imit 44-nik ukiulimmit 1998-imi marsip ulluisa aappaanni aallarunneqarpoq.
Kampuschi tigummineqarfimminit ulloq taanna qimaammat Wolfgang Priklopil qimuttuitsut ingerlasut saavannut pissilluni imminorpoq.