Kammeradvokatip Nuna Eqqartuussissuserisut suliaat tunuartippaa
Nuna Eqqartuussissuserisut Namminersornerullutik Oqartussat illuutiminnik attartortumiit piginnittumut aqutsinerat pillugu nalunaarusiaat marluk apriilip ulluisa aappaanni 2008-meersut Eqqartuussissuserisumit Poul Schmidh-imit inatsisinik tunngaveqarluni naliliiffigineqarput inerneralu Naalakkersuisut Siulittaasuanit tiguneqaqqammerpoq.
Nuna Eqqartuussissuserisut nalunaarusiaat tunngavigalugit Eqqartuussissuserisoq Poul Schmidth piumaffigineqarsimavoq apeqqutit arlallit inatsisitigut tunngavilersorluni naliliiffigeqqullugit. Apeqqummi siullermi pineqarpoq illunut ataasiakkaanut tunngatillugu tunisinernut atatillugu inatsinik unioqqutitsisoqarsimanersoq. Apeqqutip aappaani pineqarpoq pisortanut illuutit aqqanillit nalunaarusiami pineqartut pisortanut illussaatikkunnaarlugit allanngortinneqarsimanerat ilumut inatsisinik tunngaveqartumik pisimanersoq. Apeqqutit pingajuanni pineqarpoq illunut pineqartunut tunngatillugu tunisinermi atorfikkaaq attuumassuteqarpallaarsimannginnersoq kiisalu Nuna Eqqartuussissuserisut akileraartarnernut tunngassuteqartuni inerniliussaat eqqortuunersut.
Tamarmik tassa kammeradvokatimiit tunuartinneqarput.
Naalakkersuisut Siulittaasuat ilisimatitsivoq Politimesterip misissuinera utaqqimaaqqaarallarniarlugu kiisalu Eqqartuussissuserisup Poul Schmidh-ip naliliinerinit nalunaarusiaq Inatsisartut Kukkunersiuinermut Ataatsimiititaliaanut aammalu Politimesterimut tunniunneqassasoq.
Eqqartuussissuserisup Poul Schmidh-ip inatsisinik tunngaveqarluni naliliinera kalaallisuunngortinneqaleruttorpoq naatsorsuutigineqarporlu tamanna marlunngorpat naammassissassoq.
