Kammalaatinik iluaqutissiuineq oqallisigaat

Politikerit alaatsinaattullu isummersuisartut oqalugiartinneqareermata tusarnaartut apeqqarissaartinneqarput. Oqalugiartut ilaat, Inuit Ataqatigiit siulittaasuat, Kuupik Kleist, apeqqummut ersarissumik isumaqarpoq:

- Ajornartorsiut ulluinnarni naapitassaavoq, ingammillu ukiuni kingullerni kammalaatinik iluaqutissiuineq atugaanerujartulersimavoq, Kuupik Kleist oqarpoq.

Oqalugiartunut ilaasup tusagassiortup, Elna Egedep, inuiaqatigiit akornanni kammalaatinik iluaqutissiuussisarneq ajornartorsiutaaqimmat politikerit sakkortuumik isornartorsiorpai, ajornartorsiullu ersarissumik saqqummiunneqarsinnaaniassammat oqallisigitinnissaanut periarfissinneqarnertik qutsatigaa.

- Neriuppunga inuiaqatigiit akornanni oqallisigineqarluni eqqumaffigineqariartulissasoq, ajornartorsitimmi nunatsinni atugaanera assortorneqarsinnaanngilaq, Elna Egede oqarpoq.

Kuupik Kleist-ip ullumi oqallinnissamik periarfissinneqarnertik aamma qutsatigaa, minerunngitsumik politikeritut kammalaatinik iluaqutissiuussisarnerup akuerineqarsinnaannginnera eqqumaffigisariaqarmat.

- Neriuppunga soorlu manna oqallinneq atorlugu aaqqissuulluakkamik ajornartorsiutip akiorneqarnissaa pilissasoq, suliassat naapertuilluartumik suliarineqarsinnaasarniassammata, tamanullu ammanerusumik suna tamarmi ingerlanneqarsinnaasarniassammat, Kuupik Kleist oqarpoq.