"Kammak" matummat kalaallit eqqugaapput

Aarhusimi eqqaanilu kalaallinut ajornartorsiuteqartunut suliniut "Kammak", Kalaallit Illuannit Aarhusillu kommuneanit ingerlanneqaraluartoq ukiup naanerani matummat, attaveqarneq killeqalersimasoq, Kalaallit illuutaanni Århusimiittumi Inunnik isumaginninnermut siunnersorti Simon Lynge oqarpoq.

- "Kammaap" matunetatigut malunnarsigami, kalaallit atugarliortorujussuit Kalaallit Illuutaannut saaffiginnittartut ikileriangaatsiarsimasut, Simon Lynge oqarpoq.

Taamaammat piaartumik nutaamik iliuuseqarnissaq pisariaqarsimasoq, Simon Lyngep oqaatigaa.

- Pilersaarusiornikuuvugut maani kalaallinut atugarliortorujussuarnut orniguttartussanik atorfinitsitsiniarluta. Taakkulu suleqatigalugit ajornartorsiutitik qaangerniartartussaassavaat, Simon Lynge oqarpoq.

Kalaallit ikiorserniarlugit suliniut nutaaq apriilip aallaqqaataani aallartissasoq Simon Lyngep naatsorsuutigaa.

- Ilimagaarput kingusinnerpaamik apriilip aallaqqaataani aallartissallutigu. Inuttassarsiussavarput illoqarfimmilu allaaffissaannik ujarlerluta, Simon Lynge oqarpoq.