Kamaannerit, savilersornerit toqqusassiinerlu
Nanortalimmi aappariit imerniartarfimmeereerlutik angerlamut aqqutaani arfininngornerup ullaassaani kamaatilersimapput. Angerlamut apuukkamik assortuunnertik ingerlatiinnarsimavaat, tamatumalu kingunerisaanik angutip 27-nik ukiullip aapparisani savimmik tunuatigut kapivaa.
- Savik 20 centimeterinik takissusilik arnap puaasa nalaanut angutip kappussimavaa, Nanortalimmi politeeqarfiup ittua Michael Poulsen oqarpoq.
Aappariinnut ilaqutaasut Politiinut ullaakkut arfinermut qiteqqutilersoq sianerput, kingornalu angut tigusarineqarpoq. Angut eqqartuussivimmut sassartinneqarnermini savilersorsimanini pillugu nassuerpoq maannalu ulluni 14-ini tigummigallagaavoq.
Tasiilami napparsimmavimmi sulisut Politeeqarfimmut arfininngornerup ullaavani qulinut qiteqquttoq ikilerneqarsimasut marluk pillugit siarnuteqarput.
Arnaq 36-nik ukioqartoq angerlarsimaffimmi ernguffigisamini kamarujussuarsimavoq. Arnap arnaqatini alla 21-nik ukioqartoq saassussimavaa, ilaatigut puuguttamik milorlugu niaquata allaatigut toqqisimallugu, Tamatuma kingorna arnap 36-nik ukiullip angut 36-nik ukiulik savimmik naavatigut kapisimavaa. Ikilerneqartut namminneq napparsimmavimmukarsimapput, tassanilu arnaq 21-nik ukioqartoq 14-inik kilulimmik mersorneqarpoq angullu 36-nik ukioqartoq nakorsanit
marlunnit naamigut suliarineqartariaqarsimalluni.
Ernguffimmi angut alla sisamarineqarsimavoq, artulersimagamili pisunut malugisaqarsimanngilaq.
Arnaq 36-inik ukioqartoq eqqartuussivimmut sassartinneqarnermini ulluni 28-ni tigummigallagassanngortinneqarpoq.
Nanortalimmi politiit unnukkut qulingiluanngulersoq nalunaarfigitipput arnaq toqqusassineqarluni ilisimajunnaarsimasoq.
Angutip 21-nik ukiullip arnaatigisimasani pisiniarfiup saavani naapissimavaa.
- Tassani angutip arnaatikuni assamminik kivillugu toqqusassivaa ilisimajunnaartillugulu, Nanortalimmi politeeqarfiup ittua Michael Poulsen oqarpoq. Tamatuma kingorna isiginnittut politeeqarfimmut sianerput, arnarlu ingerlaannaq napparsimmaviliaanneqarluni. Angut 21-nik ukiulik eqqartuussivimmut sassartinneqareerluni ulluni 14-ini tigummigallagassanngortinneqarpoq.
