Kalistat Lundip Tunumi illoqarfik piterartoqareersoq tikeraarniarpaa.Assi: Thomas Ørum Kristensen

Kalistat Lundip Tasiilamukarnissani kinguartikkaa

Naalakkersuisup, Kalistat Lundip Tasiilamukarnissani suli pilersaarutigiaa, borgmesterillu taanna piffissami kingusinnerusumi immaqa angalaqatigissavaa.

Nunalerinermut, imminut pilersornermut, nukissiuutinut avatangiisinullu naalakkersuisup, Kalistat Lundip Tasiilamukarniarnera KNR-imit ataasinngormat oqaluttuaraarput.

Tunumi sapaatip akunnerata naanerani aserorteriffiungaatsiartumik piterarnerata kingunerisaanik tikeraarniarpoq.

AAMMA ATUARUK Tasiilami iluarsaassineq aallartittoq: Ulapeqaagut

Kalistat Lundili silap ajornera pissutigalugu ippassaq aallanngitsoorpoq. Nunalerinermut, Imminut pilersornermut, Nukissiuutinut Avatangiisinullu Naalakkersuisoqarfik tusagassiuutinut nalunaaruteqarpoq.

Taassumali angalaniarnini taamaatiinnanngilaa, taannalu angalaleruni immaqa ilagisaqassaaq.

- Tasiilaliarnissamut tunngatillugu periarfissanik nutaanik ujartuivugut. Kommuneqarfik Sermersuup borgmesteria Avaaraq Olsen ataatsimeeqatigisussaavara immaqalu marluulluta Tasiilaliarsinnaavugut, Kalistat Lund tusagassiuutinut nalunaarummi oqarpoq.

Politikerimik aallartitsinissi salliutinngikkaa

Avaaraq Olsenilli (IA) Tasiilamukarnissani maanna pilersaarutiginagu KNR-imut marlunngormat oqaatigaa. Kommunilli tassunga taarsiullugu Kommuneqarfik Sermersuumi sanaartornermut pisortaq, Rudi Birkedal aallartinniarpaa.

AAMMA ATUARUK Borgmester Avaaraq Olsen tager ikke til Tasiilaq: Der er ikke plads

Kommuneqarfik Sermersuup borgmesteria Tasiilami inuttaasunik naapitsinani, sanaartornermut pisortap aseruatiternernik nalilersuinissaa pingaarnersiuinerani salliusoq, borgmesteri oqarpoq.

- Soorunami borgmesteritut najuunnissaq pingaaruteqartorujussuuvoq. Kisianni maannakkut pingaarnerpaatut nalilersimavarput illut aserortiternikut nalunaarsorneqarnissaat qanorlu iliuuseqarfiginissaat. Ukiuliivimmat, Avaaraq Olsen oqarpoq.

Maannali isummaminik allannguisimarpasikkunarpoq.

KNR-ip borgmesteri, Avaaraq Olsen oqaaseqartinniarsarigaluarpaa, tamannali periarfissaanngilaq. Taanna ullumikkut ulapippallaartoq kommunip attaveqaqatigiinnermut immikkoortortaqarfiata nassuiaatigaa.

Kalistat Lund piffissami kingusinnerusukkut apersorneqarsinnaalluni KNR-imut oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl