Kalistat Lund Inatsisartuniikkunnaassaaq
apriilip 16-at 2005 12:09
Jørgen Wæver Johansen-ip naalakkersuisuujunnaartup inatsisartuni sulinini ingerlateqqittussanngorpaa, Jørgen Wæver Johansenillu sinniisaa Kalistat Lund inatsisartuni taamaalilluni ilaasortaajunnaassaaq.
Kalistat Lund Namminersorneq pillugu ataatsimoortumik Isumalioqatigiissitami siulittaasuuginnaassalluni, ippassaq oqarpoq.
- Suliat allanngussanngillat, danskit nunatsinnilu naalakkersuisut siulittaasuisa siulittaasunngortereerpaannga, tamannalu allannguuteqassanngilaq, Kalistat Lund oqarpoq.
Kalistat Lund Namminersornerullutik Oqartussani allaffeqaannassaaq, inatsisartunilu sulineq qanimut malinnaaffigissallugu.
Isumalioqatigiissitap suliani isumaliutissiissut 2006-mi ukiakkut naammassissavaa.