Kalistat Lund: Agguaanissamut pisinnaatitaaffeqarsimanerpat?
- Kommunalbestyrelsimi ilaasortaasut ilai nammineq kommunip allaffeqarfiani sulisuupput, kiisalu aamma kommunalbestyrelsimi ilaasortaasunut ilaqutaasut ilai kommunemi sulisuullutik. Tamakkua namminneq iluaqusersorsimasinnaannerat ilumut pissusissamisoornersoq isumaqarpunga misissorneqartariaqartoq. Aamma tupinnarpoq kommunemi pisortaasut, tassa siunnersortaasut taamatut aningaasarseqataasussallutik aalajangeeqataasimassappata. Taamaammat pingaaruteqarpoq eqqortumik iliortoqarsimanersoq paasiniassallugu, Kommunerujussuarmi aningaasaqarnermut ataatsimiititaliami ilaasortaq Kalistat Lund oqarpoq.
Kujataani Ikaarsaariarnermut Ataatsimiitsitaliami siulittaasunngortussaq Simon Simonsen, pisumut oqaaseqartinniaraluaratsigu oqaaseqarumanngilaq, oqaatigaluguli Narsap kommuneani pisimasoq uggoralugu. Pisorlu Kommuneqarfimmut nakkutilliisunut misissugassanngortissimallugu oqaatigaa.