Kalerrisaarut BP-p qillerivianiittoq qaminngasimavoq
Uuliasiorfimmi apriilip ulluisa 20-anni qaartoortoqarmat, kalerrisaarut, arlaannik ajortoqarpat uuliaatileqatigiiffiup BP-p qilleriviani Deepwater Horizonimi sulisunut kalerrisaarisussaq, aamma gassimik aniasoqalissagaluarpat kalerrisaarisussaq, piaaraluni qaminneqarsimavoq.
juulip 23-at 2010 14:08
Aviisimi The Washington Postimi tamanna allaaserineqarpoq.
Qaartoornermi inuit aqqanillit ajunaarput, Mexicollo Kangerliumanersuanut uulia maqerujussuarluni.
Kalerrisaarut piffissaanngitsukkut aallartittaannarmat sulisut assut uumigisimavaat, taamaammat siornali qaminneqarpoq. Teknikerip Michael Williamsip qaartoorneq pillugu naalagaaffimmiit misissuisunut taama nassuiarpaa.
Michael Williams Deep Water Horizonimi qaartoortoqarmat imminut annaanniarsinnaasimavoq.
Aviisimi Washington Postimi allaaserineqartut naapertorlugit, isumannaallisaaneq pillugu nakkutilliisut uuliasiorfimmi ingerlatsisut arlaleriarlutik akiliisittariaqartarsimavaat, kalerrisaarutit pillugit inatsisinik unioqqutitsisarnerat pissutigalugu.
