Arnajaraq Davidsen eqqisseqqinnaarluni sinippoq ajunaarnersuaqarnerani kalerrissaarut Nuummi sapaatip ullaassaani siggartarmat.Assi: KNR

Kalerrisaarut aallartittoortoq: Nuummiut ilaasa tusaanngitsooraat

Ajunaarnersuaqassappat kalerrisaarut Nuummi sapaatip ullaassaani siggartarmat Nuummiut ilaasa arajutsisimammassuk inuttaasumit ernumanartinneqarpoq.

Nuummi innuttaasut ilaat, Nuummi illoqarfiup qitiusortaani najugaqartoq, isumaqarpoq, ajunaarnersuaqassappat kalerrisaasutip, navianartoqalerneranik innuttaasunut mianersoqqusisussap, aallartinneqarnermini innuttaasunit tamanit tusaaneqarsinnaasariaqartoq.

Ajunaarnersuaqarnerani kalerrisaarut aallartippat imaaliussaatit:

 

Siggarnera siulleq: 'Iserit'

Nippakkiartoriarluni nipikilliartortoq . Siggarnera sekundini 45-ni sivisusseqartoq sisamariarluni uterneqassaaq.

  • Taava isissaatit, matut, igalaat silaannarissarfiillu matussavatit.
  • KNR TV-mi radiomiluunniit paasissutissanik misissuigit.
  • Siggartaatip aappaa utaqqiuk: 'Navianartoq qaangiuppoq'.
  • Pisortat KNR TV-kkut radiokkulluunniit navianartorsiornermik qaangiuttoqarneranik nalunaaruteqarnissaat utaqqiuk.

Siggarnerata aappaa: 'Navianartoq qaangiuppoq'

Sivisuumik siggartitsitsineq sekundinik 45-nik sivisussusilik.

  • KNR TV imaluunnit radio navianartup qaangiunneranik nalunaaruteqarpoq.
  • Maanna illup iluanit aneqqissinnaalerputit.

Tusarfik: Upalungaarsimanermut ataatsimiititaliaq

- Uanga tusaangitsoorpara. Sinippunga. Aatsaat aqaguani ullaakkit iterama tusaavara. Ah naamik, tusaangilara facebookikkut takuara aatsaat, Arnajgaqaraq Davidsen Blok 6-imi najugaqartoq oqaluttuarpoq.

Tamannalu ernumanartoqartippaa.

- Isumaqartorujussuuvoq uannut, tassami toqqissillunga maani angerlarsimagama. Taava taamatut pisoqarnerani imaassinnaasoq ilaa maani blokkeq ajutoorujussuarluni uanga itinngitsoorlunga toqusunga. Taamatut pisoqarsinnaavoq, Arnajaraq Davidsen oqarpoq.

AAMMA ATUARUK Ullaassaq Nuummi innuttaasut kalerrisaammik kukkunermik itertinneqartut

Kingusinnerusukkullu paasineqarpoq ajunaarnersuaqarnermi kalerrisaarutini pingasuusuni marluk kisimik ikissimasut. Ataaseq qatserisartoqarfiup eqqaani allalu Nuussuarmi Pisiffiup eqqaani. Kalerrisaarutit pingajuat Nuummi Timersortarfiup eqqaaniittooq ajoquteqarluni aallartissimanngilaq. Taamatullu aamma Qinngorpumi kalerrisaaruteqarani.

Tamannali aaqqiivigineqassasoq upalungaarsimanermut pisortap oqaatigaa.

- Haalip eqqaniittoq iluarseriarlugu soorunami Qinngutsinni aamma pilertussaavarput. Naluara una qaammataassanersoq, imaluunniit ullut 14-nit imaluunniit qaammat ataaseq, ukiut affaaluunniit, naluara, Knud Petersen oqarpoq.

Arnajaraq Davidsenilli ulapalungaarsimanermik suliaqartut kalerrisaarutinik aatsaat iluarsiinialernerat kingusippallaarsoraa.

- Torraginngilara aatsaat taamatut aaqqiinialersut. Kingusinaartutut isigivakka taamatut, Arnajaraq Davidsen oqarpoq.

Siunissarli eqqarsaatigalugu inuit ernumassutissaqanngitsut, Knud Petersen naggasiivoq.

- Siunissaq eqqarsaatigalugu innuttaasut ernumassutissaqanngillat. Arlaanik pisoqassappat, uagut Politiit suleqatigalugit, iluamik ajortoqaavissagaluarpat kalerriissaagut, Knud Petersen oqarpoq.

Ajunaarnersuaqalerneranut kalerrisaarut sumik peqquteqarneranik paasineqanngitsumik siorna aallartinnikuuvoq.

Nunatsinni kalerrisaarut - Sirenevarsling i Grønland

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat