København: Kalallit Illuutaat Københavnimiittoq inuusuttunut navianartorsiutunut naapittarfimmik ullumi ammaavoq
Inuit nalinginnaasut ILIK-mukartarput.
Ilik pillugu filmiliaaqqami peqataasut ilaat taama oqarpoq.
Café nutaaq kalaallinut inuusuttunut Københavnimiittunut 18-iniit 30-inut ukiulinnut naatsorsuussaavoq.
Ilitsersuisutigut suliniummut ILIK-mut café ilaavoq, suliniullu taanna Kalaallit Illuutaata 2012-imiilli ingerlataraa. ILIK-mik ilitsersuisoqarnermillu aaqqissuinermik atuisut videoliami oqaluttuaraat Danmarkimut nuukkaanni ikorfartorneqarnissap qanoq pingaaruteqartiginera. Kalaallillu Ilik-mit ikiorserneqarsisimasut iluaqutigaat.
Inuttut nammineq pigisavut aamma unammillernartut nuannersullu oqaluuserisarpavut. Oqimaatsuinnaat pineqarneq ajorput.
Ilimmit ikiorneqarsimasut ilaat filmiliaaqqami taama oqarpoq.
Københavnimi kalallit inuusuttut navianartorsiortut Kalaallit Illuutaata sivisulaartumik sammisimavai, misigisimallugulu kalaallit inuusuttut amerliartuinnartut Danmarkimi inuiaqatigiinni inissikkuminaatsitsisut Københavnimut pisartut.
- Avatangiisinut naviartorsiorfiusinnaasunut qimakkuminaatsissinnaasaminnut pulajaartarput. Tamaattumik uagutsinnut pingaartuuvoq taamaattunut periarfissamik allamik siusissukkut suliniuteqassalluni naapiffissamillu toqqissisimanartumik neqerooruteqassalluni, ILIK-mik suliniutip ingerlanneranut pisortaq Mille Schiermacher oqarpoq.
Cafémik ingerlatsinermut sullitassarsiornermullu Kalaallit Illuutaata isumaginninnermut siunnersortitut ilinniarsimasoq Ivalu Lund atorfinitsippaa.
- Café ILIK tassaassaaq siumut isummerfigineqareernani qaffasissorsuarnillu ilimagisaqarfigineqarnani orniguffigisassaq, oqaatigiumasanik tusarnaarfigineqarfik ikiorneqarnissamullu periarfissaqarfik. Aamma neriuutigaarput takkuttut ilaat ilinniagaqarnissamut suliffeqalernissamulluunniit ikiorsinnaassallugit, Ivalu Lund oqarpoq.
