Kalallit Danmarkimi ilinniartut SU-mik qinnuteqartariaqarput

Kalaallit Danmarkimi ilinniartut qallunaat assigalugit pisinnaatitaaffeqassasut, Siumut isumaqarpoq. Siunnersuulli tassunga tunngasoq Inatsisartuni amerlanerussuteqartut Naalakkersuisullu ullumi itigartippaat, allamik aqqutissaqartoq oqarlutik.
Allattoq Jens Thorin
marsip 16-at 2011 18:33

- Pisinnaatitaaffiit ilinniartunut tunniukkumasat, danskit ilinniartunut tapiissuteqartarnermut aqqissuussaannut, SU-mut nuukkaaani anguneqarsinaapput. Tassami SU-mik pisaleraanni danskit iliniartut pisinnaatitaaffigisaat anguneqassapput. Taamaaliortoqaraangallu pitsaaqutigaa, ilinniartunut tapiissutit katikaanni amerlaqisut, Nunatta Karsiata nammakkunnartarmagit, ilinniartitaarmut naalakkersuisoq, Palle Christiansen, taama kaammattuivoq..

Kisianni Siumup siulittaasua Aleqa Hammond, ilaatigut ilinniartut atuarfiliarnerminni bussinut akiliutaannut apparsaataasussamik siunnersuuteqartuusoq, naapertorlugu taama piuminartiginngilaq.

- Kalaallit Danmarkimi ilinniagaqartortatta Nunatsinnut tamakkiissumik attuumassuteqarnertik pingaartippaat, Nunatsinniillu aningaasalersorneqarnertik qujamasuutigalugu, eqqartartaatsimikkut, uummatimikkut kinaassutsimikkullu. Isumaqanngilanga, Naalakkersuisunit oqarfigiinnarneqassasut, danskit SU-annut nuuinnaqigitsi, qallunaanillu isumagineaqalerlusi. Tamanna eqqortuungilaq, Aleqa Hammond, taama oqarpoq.

Palle Christiansenli tassa isumaqarpoq, ilinniartut taamaaliortariaqartut.

- Kinaassuseq aallavigalugu eqqarsarneq ataasiuvoq, naammassinninnissaq siunertaralugu eqqarsarnerneq allaalluni. Iluaqutissaq aningaasalersornissaannut tunngasumik ajornartorsiuteqarpugut. Kisianni matumuuna iluaqutissat danskit ilinniartitaanermut aaqqissuussineratigut pissarsiarisinnaavagut, tassalu aamma taamaalilluta danskit aningaasaatat iluaquitigisinnaallutigit, Palle Christiansen oqarpoq.

Aamma kalaallit Danmarkimi ilinniartut ilaatigut atuagarsinermi aammalu atuarfimmut bussernermi tapiiffigineqartaleqinnissaanik imaqartumik, Naalakkersuisut ukiakkut ataatsimiinnissami siunnersuuteqassasut, ilinniartitaanermut naalakkersuisoq erseqqissaavoq.

Aleqa Hammondip siunnersuutaa Atassutip tapersersorpaa, kisianni naaalakkersuisuutitaqartut itigartitsimmata, siunnersuut apriilimi aappassaaneerneqannginnermini ataatsimiititaliami ilinniartitaanermut suliarineqassanngilaq.