Kalaallit Århusimut nutsertut amerliartorput
Kalaallit suffissaqaratik inissaqaratillu avalattut aatsaat taama amerlatigisut Århusi ukiormanna nutserfigaat.
Arlallit Jyllandip illoqarfiisa annersaannut tikittarput inissaqaratik, ilaallu ilaquttamik ikinngutimilluunniit nalaasaarfiani sinittarnissartik naatsorsuutigalugu nuuttarput. Taama pisarneq ajornartorsiutitaqanngitsuunngitsoq, Århusimi kalaallit Illuanni isumaginninnermi siunnersorti, Simon Lynge, oqarpoq.
- Saaffiginnikkaangamik oqartarput, inisimaffigut naami najorsinnaajunaarpagut, unnuami eqqissilluta sinissinnaanngilagut toqqissillutalu ilaqutariittut inuusinnaanata, Århusimi kalaallit illuanni isumaginninnermi siunnersorti Simon Lynge aallartippoq. Ukiormannaannaq inersimasut aqqanillit katillugit tallimanik meerartallit ikioqqullutik saaffiginnissimapput, siorna taamaalinerani saaffiginnittut marloriaatigalugit.
Nunatsinneersut Århusimut nuunnissartik tappavani ilisarisimasaqarnerminnik pissuteqartittarpaat.
Århusimut 300.000-inik inoqartumut kalaallit 16-it nuuttut amerlagisassaanngikkaluarput, kisianni:
-Århus illoqarfissuuvoq imaaliaallaannaq inimik pissarsiffissaanngitsoq, pisortat privatilluunniit ingerlataanni. Kalaallit ajornartorsiuleraangamik unnuisarfinni hoteliniluunniit unnuinissamut aamma akissaqarneq ajorput, aningaasanngorlugit ikiuutisiassaat amerlanertigut suli inissinneqarsimasanngimmata, Simon Lynge nassuiaavoq.
Arlallit qallunaat oqaasiinik ilinniarnissartik pissutigalugu nuunnerartaraluartut itinerusumik oqaloqatigilerlugit paasinarsisarpoq Kalaallit Nunaanni inuuniarneq ajornartorsiutaasimasoq.
- Imaassinnaavoq angerlarsimaffimmit anisitaasimasoq imaluunniit inissaaleqisoq, aamma suliffimmit soraarsitaasimasuusinnaasarpoq imaluunniit inuttut ajornartorsiuteqartuusarluni, Kalaallit Nunaanni inunnik isumaginnittoqarfimmi ikiorserneqarsinnaanngitsumik, Simon Lynge naggasiivoq.
