Kalaallit Århusimik akerliussutsimik takutitseqataassagunanngillat

Rosa Thorsen Århusimiippoq kalaallillu arlallit naapissimallugit. Akerliussutsimik takutitsinissaq qanormitaava isumaqarfigineqarpa?

- Kalaallit arlallit oqaloqatigisama peqataaffiginiarnagu nalunaarput. Isumaqarput islamimik upperisaqarneq akerliussutsimik takutitsissutigissappassuk immikkoortitseqataassallutik, soorlu kalaallit immikkoortinneqaraangata, Rosa Thorsen oqarpoq.

Isumaqarpoq peqatigiiffiat SIAD tassaasut qallunaat ingasaassillutik talerperliuniat, Danmarkimi inatsisisit tunngaviusut aallaavigalugit ingerlatsinissamik illersuisut.

- Kalaallit ilaannit peqatigiiffimmi ilaasortat kalaallinik illersuiniartuusaartutut isigineqarput.

Kalaallit Danmarkimi najugallit kalaallit erfalasulisaarnissaat islamisiornerup siaruaannissaanut akerliunermi atorneqarnissaa qanoq isumaqarfigineqarpa? Apereqqipparput.

- Kalaallit Erfalasutta peqatigiiffiup nittartagaani atorneqarnera kalaallip arnap Danmarkimi najugaqavissup Århus Stifftidendemi uparuarpaa, oqarluni peertariaqartoq. Kalaallinik ikiuiniarneq qujanaraluartoq, kisianni erfalasutta nittartakkamit peernissaa inussiarnersumik qinnutigaa, Rosa Thorsen tusagassiivoq.

Rosa Thorsen isumaqarpoq, aqagu akerliussutsimik takutitsinissami Rådhuspladsimi nalunaaqutaq ulloqeqqanut aallartittussami tupaallannartoqassanngippat kalaallit peqataanissat ilimanaateqanngitsoq.

- Tamaallaat alapernaatsut imaluunniit kalaallit marserlutik takkussinnaapput, Rosa Thorsen oqarpoq.