Kalaallit Århusimi nunami allamiunit malersugaapput
Kalaallit Århusip eqqaani Gellerupimi najugallit ammip qalipaataa tunngavigalugu arabiamiunit somaliamiunillu malersugaapput, aviisi ullormut saqqummersartoq Århus Stifttidende allappoq.
- Kalaallit danskisut innuttaassusillit ikinnerussuteqartulli Danmarkimi najukkaminni eqqissiviitsutut pineqarput. Ujaqqanik milloorlugit mitaatigalugillu qimaatinneqartarput. Taamaaliortuupput arabiamiut inuusuttut somaliamiullu ammip qalipaataa tunngavigalugu malersuisut. Kalaallit Gellerupimi najugallit ersiortitaangaaramik inigisaminnit aamma aninaveersaartalerput.
-Opgangeqatitta ilaannit saassunneqareerlunga saassussisup anaanaanut saaffiginnikkaluarama matu matorluinnarpaa. Nassuiaanniaraluarpara kalaallit uagut danskisut innuttaassuseqarlutalu danskit naalagaaffeqatigigigut. Paasisinnaanngilaalli, Naasunnguamik imminut taasoq aviisimut oqarpoq. Naasunnguup ativini aviisikkut nalunaarutigerusunngilaa, annerusumik malersortilernissani siooragalugu.
Naasunnguaq ukiut 16-issaa Gellerupimi eqqaanilu najugaqarpoq. Eqqaamioraa Larsimik ateqartuusaartitaq, aamma malersugaasaqisoq.
- Race tunngavigalugu nikassarneqartaqaagut. Paasisinnaanngilaat sooq Danmarkimi najugaqartugut, oqarpoq. - Immaqaana sinngagisaraatigut, Lars nangippoq.
Kalaallit najukkamik eqqaani atuakkanik atorniartarfimmi Pinden-imi Nettollu saavani naapeqatigiittarnerat, sapaammilu arsaqatigiittarnerat, ujaqqanik milloortittuarnerup kingunerisaanik aamma unittariaqarsimasoq, Lars oqaluttuarpoq.
- Allaammi Gellerupip ilaani inuiattut ullorsiornerput juunip 21-ianni milloortiingaaratta unitsiinnarsimavarput. Kalaallit ornittagannaaminnit ukiuni kingullerni nigortinneqarput.
Kalaallit ikiorniarlugit suliniummi Kammak-mi suleqataasut ilaat Søs Birch Århus Stifttidendemut oqarpoq, kalaallit saassutsinnginniassammata ilaanni immikkut nakkutilliisulersortariaqartalersimagitik.
Arabiamiusut innuttaassusilik kulturit arlallit naapeqatigiiffianni siulittaasoq Århusillu byrådiani kulturikkut suliniutit pillugit ataatsimiititaliami siulittaasoq Rabih Azad-Ahmad oqarpoq, angutit inuusuttut arabiamiut somaliamiullu saassussisarnerat, sanngiinnersiuinermik nukinillu atuisinnaanermik ilaminnut nittarsaassiniakujunnermik tunngaveqartartoq.
-Kalaallit nikagisaanerat, pissutsit qanoq innerannik ilisimaatsunermik, pigiliutiinnakkamillu kalaallinut isummersimanermik pissuteqartoq, Azad-Ahmad oqarpoq.
Kalaallit saassunneqartarnitik qaqutigorsuaannaq politiinut nalunaarutigisaraat Århusimi Politiit oqarput.
Aamma ammip qalipaataa tunngavigalugu malersugaasimasut inuttullu pisinnaatitaaffinni illersuiniaqatigiit allaffii, kalaallit malersugaasarnerat pillugu ilisimasaqanngillat.
