Kalaallit Ålborgimi najugallit danskisut ilinniaqiffissaqalerput

Mai-Britt Andersen isumaqarpoq ilinniarfinnik suleqateqartarnertik siusinnerusukkut pinerusariaqartoq.

- Soorlu assersuutigalugu tekniske skolemut suleqateqarnerput siusinnerusukkut pisariaqarpoq suli inuusuttut danskisut ilinniaqqinnissaannik neqeroorfiginnginneranni, Mai-Britt Andersen oqarpoq.

Taanna aperaarput sooq taamak pingaartigitinneraat kalaallit inuusuttut pinngitsooratik danskisut pikkoreqqissaarnissaat.

- Assassorluni sulinermik ilinniagaqarnerup ullumikkut piumasaqaataat qaffasingaatsiartorujussuupput, malinnaalluarniaraannilu danskisut piginnaasat aamma pitsaasuusariaqarput, Mai-Britt Andersen oqarpoq.

Taassuma uggornartuunerarpaa oqaatsit aporfiusimappata ikiuuttoqaranilu ilinniakkamik unititsisoqassappat.

Mai-Britt Andersen aamma erseqqissaavoq misigisaritsik inuusuttut Kalaallit Nunaanniit tikittartut atuagarsornikkut misilittagakitsuararsuusarnerat tamannalu meeqqat atuarfianniit allaaveqarsoraa.

- Pingaaruteqarluinnarpoq meeqqat atuarfianni angusaqarluarsimanissaq, tassami meeqqat atuarfiata isumagisussaavaa inuusuttut ilinniakkatigut ingerlariaqqinnissaannut iluamik tunngaviliilluarnissani, Mai-Britt Andersen oqarpoq.

Taanna apereqqipparput, ilumut ima isumaqarnersoq Kalaallit Nunaanni meeqqat atuarfiat naammattumik tunniussisanngitsoq.

- Tassami inuusuttut maanga takkuttartut danskisut naammattumik pikkorissuseqarneq ajorput aammalu ilinniakkamut ingerlaqqinnissaminnut atuagarsornermik naammaginartumik pisinnaaneq ajorlutik, naak ilikkagassat nalinginnaasuinnaagaluartut, Mai-Britt Andersen oqarpoq.

Nangipporlu:

- Kalaallit Nunaata piumaguniuk innuttaasut ilinniagaqarnerunissaat taava meeqqat atuarfiat nukittorsartariaqarpaa, tassanngaanniimmi suut tamarmik aallartittussaapput. Taannalu pitsaanngippat taava sinnera aamma ajussagami, oqarpoq.

Taanna qalleqqissarlugu aperaarput kalaallit danskinut innuttaaqataammata tamanna ajornartorsiutissarsiornertut paasineqalernissaa annilaanngatigineqalersinnaannginnersoq.

- Aap, kalaallinik angusaqarluarsimasorpassuaqarpoq kisianni pitsaavallaanngitsumik angusaqartartut ajunnginnerusumik iliuuseqarfiginiarutsigit atuarfeqarfik pitsaanerusariaqarpoq, danskillu oqaasiinik piginnaanikinneraasoqarpat taanna qularutissaanngilluinnarpoq, Mai-Britt Andersen naggasiivoq.