Qasigiannguaneersoq Judithe Jørgensen erinarsoqataalu Paamiormiu Ivalu Josefsen, unammisitsinissamut tallimanngormat aallakaatinneqartumi misilitsipput.

Naliliisartullu Danmarkimi tusaamaneqarluartut tupaallatsinneqaqaat.

- Nuanneq, tupinnaq. Fjernsynikkut isiginnaaginnartarlugit, sassareerluni tassanngaanniillu saavanniileriasaarluni erinarsorluni misigisaq oqaasertaleruminaappoq. Piffissaq sukkaqaaq, Ivalu Josefsen oqarpoq.

AAMMA ATUARUK X-Factorimi peqataasoq isertuussillaqqissoq

Erinarsornermik unammisitsinissami X-Factorimi peqataasinnaanermut misilitsinnerit Aarhusimi ingerlanneqarput.

Unammisitsinermilu naliliisartoq aalajangersimasoq pissangataaqaaq:

 - Blachman! Blachman pissangaginikuugatsigu, sakkortugami. X-Factorimut peqataannginnitsinni immitsinnut quujasaaruttarpugut 'naa, anisissaqaatigut, akerartussaqaatigut', Ivalu Josefsen illarpoq.

Akuersinerit pingasut

Judithe Jørgensenip Ivalu Josefsenillu Texasip atugaa "Listen to me" misilitsissutigaat naammassigamillu ingerlaqqipput.

Naliliisartorlu naakkittaassinnaasartoq Thomas Blachman ima oqarpoq:

 - Nipilersugaavoq torrallataq 70-ikkornisarpalaartoq. Nuannersumik tupaallatsippatsigut - aap, ilaana ingerlaqqippusi, Blachman oqarpoq.

X-Factorimi naliliisartut allat Sanne Salomonsen Remeelu aamma akuersipput, Blachmanilu ima nangilluni:

- Kalaallit Nunaanneersuunerallu alutornaq, assigineqanngillat. Angusarissaarluassaqaat.

AAMMA ATUARUK Mike Fencker Thomsen X-Factorimi misilitsinermi siullermi iluatsippoq

Ingerlaqqittut aperaagut X-Factorimi unammeqataalerunik kalaallisut erinarsorniannginnersut. Nipangersimasussaatitaanermilli atsiorsimallutik ilisimatitsipput, taamaammat tamanna oqaaseqarfigisinnaanngilaat.

X-Factor DR1-ikkut tallimanngorpat unnukkut nalunaaqutaq arfineq-pingasunut aallakaatinneqassaaq.

Judithe Jørgensen Ivalu Josefsenilu Facebookikkut aamma malinnaavigineqarsinnaapput.