Kalaallit VM-mut anngunniunnissaat: Puerto Rico-mi unammisoqassanngilaq

Kalaallit Nunaata USA-mut, Canadamut Puerto Ricomullu unammilluni VM-imut anngunniunnissaa aarlerinartorsiorpoq, Puerto Ricomimi unammiffiusussami coronavirus ilungersuutigineqarpoq.

Arsaq maanna assammik arsartartut nunarsuaq tamakkerlugu kattuffiata IHFip tigummilerpaa amerikap avannaamiut Caribiamiullu VM-mut anngunniullutik unammissanerannut aalajangernissamut.

NACHC-mi ilaasortat sisamanngornermi unnukkut ataatsimiipput tassanilu paasinarsivoq Puerto Ricomi unammisoqarsinnaanngilaq. Nunarsuup sinneranisulli coronap tuniluunnera Puerto Ricomi ajorsiartorpoq. Taamaattumik novemberip aappaaniit arfineq pingajuata tungaanut unamminissatut pilersaarutit taamaatiinnarneqarput.

AAMMA ATUARUK VM-mut neriuutit coronap akornusersinnaavai

NACHC-milu ilaasortat allatut iliuusissamik siunnersuummik isumaqatigiissuteqarput.

- Siunnersuupput sunik imaqarnersoq oqaatigisinnaanngiklara. Tamanna IHF-ip councilianik taaneqartartumi aalajangiiffigineqassaaq, taannaavormi immikkorluinnaq ittunik pisoqartillugu aalajangersaasartoq, NACHC-mi unammersuarnermut ataatsimiititaliami siulittaasoq Kurt Lauritsen KNR-mut oqarpoq.

Assammik arsarnermi VM 2021-mi januarip naalernani Egyptenimi pisussatut pilersaarutaavoq – nunarsuarmi unammersuarnerit angisuut allat assigalugit kinguartinneqanngikkuni.

Puerto Ricomi unamminissaagaluamut nunat sisamat nalunaarput. Aaqqissuisuusussaagaluartut saniatut nalunaartut tassaapput USA, Canada aamma Nunarput.

2007-miilli Nunarput VM-ip naggataarnerani peqataanikuunngilaq, angutilli inuusuttut U-21-ut 2009-mi VM-qataapput unammersuarneq Egyptenimi pimmat.