Kalaallit VM-imut anngupput

Kalaallit angutit assammik arsartartut unammisartui Amerikap nunavittaani assammik arsarluni Brasiliami pissartanngorniunnerni siullerpaamik bronzennapput, amerikamiunut 30 -29-imik ajuukkamik, Nunarsuarmilu pissartanngorniunnissanut taamaasillutik anngullutik. Unammisimasut ullumi attaveqarfigaagut, unammisullu talerperlerisartagaat saamerlerisartagaat nukarlersaallu 17-inik ukiulik Johannes Groth aperaarput angusaqarluarnertik pillugu qanoq misigisimanersut, imalu akivoq:

- Anngunnerput upperinngikkaluarparput. Kisianni qujanartumik annguppugut aamma nuannaaqaagut.

Johannes Groth unammeqataalluarsimasoq taama akivoq. Oqarpoq ingammik amerikamiunut angisuunut unamminerminni nammineq mikisuunini sukkasuuninilu assut iluaqutaasimasut. Oqarpoq mikinini iluaqutigalugu unamminerni tamani akeqqat 2 minutsini anisitaasarsimasut, unamminerillu tamaasa eqqarsaatigalugit katillugit pingasunik isertitaqarsimanerarpoq. Kalaallit unammiartut inersimasut inuusuttullu akuleriilluarnerat angusaqarluarnermut pissutaanerpaasoraa.

Amerikamiunut ippassaq unamminermi kalaallit siuaqqaannaavissimapput illersuisorissaarlutillu, taamaattorli unamminermut kalaallit arlaleriarlutik unammeqattaarsimanerat kiassuarlu assut qasunarsimasut malunnarsimasullu Johannes Groth oqaluttuarpoq.

- Kisianni massakkut pikkorisseriarujussuarsimasugut malunnarpoq.

Nunarsuarmi pissartanngorniunnissani unammisassat massakkut unammisimasanit sakkortunerunissaat kalaallit naatsorsuutigaat, tamaakkaluartorli ukiup affaani tulliuttumi puiareersarluarnissamut piareersimallutik Johannes Groth oqarpoq.

Angutit assammik arsartartut unammisartui sinnerlugit Brasiliami unammeqataasoq, Johannes Groth taama oqarpoq. kalaallit unammisartuisa ilaat juunip 13-ianni 14-iannilu nunatsinnut tikissapput. Brasiliami unamminerni ajugaasuupput Brasiliamiut 2-nngorlutillu Argentinamiut. Angutit nunasuarmi assammik arsarlutik Tysklandimi pissartanngorniunnissaat januaarip 17-ianni aallartissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat