Kalaallit utoqqaat utoqqalinersiatik nikisinnagit DK-mut nuuttarlik

Danskit utoqqalinersiatik pigiinnarlugit nunatsinnut nuussinnaanngippata, taava aamma illuatungaatigut kalaallit Danmarkimut nuukkaangamik Kalaallit Nunaanni utoqqalinersiatik pigiinnartariaqaraat Danmarkimi Dansk Folkeparti isumaqarpoq.

Kalaaleq 71-nik ukiulik Kjeld Holm ukiut arfinillit matuma siorna Nuummiit Danmarkimut nuuppoq, taannalu isumaqarpoq tamanna isumassarsiatsialaanngitsoq.

- Taamanikkut utoqqalinersisalernissara ukiunik pingasunik sioqqullugu paasiniaqqaarpara, nunatsi qanoq utoqqalinersisoqartarnersoq, kisiannili paasinngitsoorakku aalajangiinnarpunga Danmarkimut nuuginnarniarlunga. Nalunnginnakkumi Danmarkimi amerlanerusunik qaammammut pisartagaqartussanngussallunga, Kjeld Holm oqarpoq.

Qanorpiarliuna utoqqaat Danmarkimiit nunatsinnut aammalu nunatsinniit Danmarkimut nuukkaangata inissisimasartut?

Danskit aappariit utoqqalinersiallit ukiumut tunngaviusumik 56.900 koruuninik aningaasarsiaqarput, taakkulu saniatigut 57.300 koruuninik ukiumut utoqqalinersianik tapisisarput. Taakku katikkaanni ukiumut 114.168 koruuniupput.

Tassa taamak Danmarkimi aappariit utoqqalinersiallit isertitaqartarput.

Nunatsinnulli sanilliuteriartigit, nunatsinni utoqqalinersiallip ataatsip ukiumut 88. 812 koruunit isertittarpai, tassalu Danmarkimut sanilliullugu 25.350 koruuninik minnerusumik nunatsinni utoqqaat qaammammut aningaasarsitinneqartarput.

Danskit utoqqalisut aappariit Danmarkimiit nunatsinnut nuukkunik utoqqalinersiatik pigiinnassasoralugit nunatsinnut nuukkaluarput, sunaaffali 2000 koruuninik minnerusunik utoqqalinersiaqalissallutik.

Utoqqaat taakku naammagittaalliulermata tamanna folketingimi misissorneqalerpoq.

Taamatuttaaq folketingip paasissutissiisimanera naapertorlugu Namminersornerullutik Oqartussat Danmarkimi naalakkersuisunut paasissutissiisimapput, inatsisinik atuuttunik allanngortitserusunnatik. Paasissutissat taakku Danmarkimi naalakkersuisut Dansk Folkepartiillu isumaannik naapertuupput, taakkumi isumaqarmata Danmarkimi utoqqalinersiallit utoqqalinersiatik pigiinnarlugit nunatsinnukartassappata taava illuatungaatigut kalaallit utoqqalinersiallit Danmarkimut nuukkaangamik maleruagassat malillugit pisartagaqartariaqartut.

Kjeld Holm Danmarkimi qaammammut skatte peereerlugu 10.000 koruunit sinnerlugit isertitaqartarluni oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat