Kalaallit USA-p ilaasortaajunnaarsinniarsarai

Kalaallit Nunaata assammik arsarluni nunanut allanut unammisartui angutit nunarsuaq tamakkerlugu pissartanngorniuttoqarnerani naggammik peqataapput.

Kalaallit Nunaanni Assammik Arsartartut Kattuffiata paasisai naapertorlugit, nunatta nunanut allanut unammisartui Amerikap nunavittaani assammik arsarluni unammersuartartut Kattuffianniit USA-p anisinniarsarai.

Nuna tamakkerlugu sungiusaasup, Jakob Andreasenip, kalaallit assammik arsartartuinik sungiusaalluarpallaarsimanera tamatumani ajornartorsiutaagunarpoq.

- Nunarsuaq tamakkerlugu pissartanngorniunnissamut anngutinngitsoornini, tassa ajugaasup tulliata tulliatut inissinnini, USA-p soorunami pakatsissutigaa. Siunissami tamanna pinngitsoortikkusuppaat, sungiusaasoq, Jakob Andreasen, TV2-p timersornermit aallakaatitaanut oqarpoq.

Isuma taanna Kalaallit Nunaanni Timersortartut Kattuffianni nunarsuaq tamakkerlugu siunnersortaata, Jens Brinchip, tapersersorpaa.

- Isumaqarpunga aqutsisut ilaat ajornartorsiuteqartut. USA-mi Kalaallit Nunaannut kingullermik ajorsarpoq, Jens Brinch oqarpoq.