Kalaallit unammisartui Nuummi VM-imut anngukkusupput

Kalaalliit assammik arsartartuisa angutitai, nunanut allanut unammisartut, Amerikap Nunavittaani pissartanngorniuunnermi kingullermi målimik ataatsimik amigalaarlutik Nunarsuarmi pissartanngorniuunnissamut anngutinngitsoornikuupput. Ukioq manna VM-imut anngunnissaq siunertaavoq.

Unammisartut Nunatsinneersut Danmarkimilu inuussutissarsiutigalugu unammisartuusut qaammatimi matumani Savalimmiuni sungiusariarlutik naapipput. Tassani sungiusarnerit saniatigut savalimmiuni klubbit pingasut unammivaat. 

Unamminerni marlunni ajugaapput ataasiarlu naligiillutik, tamannalu nunanut allanut unammisartunut sungiusaasup, Ingi Olsenip, naammagisimaarpaa. 

- Sungiusarnitsinni saassusseriasaartarnerput pitsanngorsarniarsaraarput, tamannalu ingerlalluarpoq. Ataatsimut isigalugu sungiusariarnerput iluatsilluaqaaq, sungiusaasoq oqarpoq, oqaatigalugulu pingaartumik Savalimmiuni klubbimut VIF-mut 35-25-imik ajugaanertik iluarisimaarlugu. 

Unammisartut Savalimmiuni naapinnerat Amerikap Nunavittaani pissartanngorniuunnissamut, juunimi Nuummi pisussamut, piareersaatit ilagaat. Piareersarnerilli ukiut marluk matuma siorna aallartereersimapput. 

Ukiuni taakkunani marlunni unammisartut timikkut nukkassarsimapput, tamannalu malunnartoq oqaatigineqarpoq.  

Ingi Olsen 2014-imiilli sungiusaasumut ikiortitut atuuffeqarpoq, 2017-imili novembarimi Assammik Atsartartut Kattuffiata aalajangerpaa Olsen nunanut allanut unammisartunut sungiusaasunngussasoq.

- Unammisartut nukittussusaasa misiligarneqarnerini amerlanerit nukittorsimasut takuneqarsinnaavoq, Olsen oqaluttuarpoq. 

- Maanna Pan Am-ip qalliartornerani sungiusaqatigiittarnissarput pingaaruteqarpoq. Tamanna sungiusaasutut ikiortip, Rasmus Larsenip, isumagisassavaa. Taassuma unammisartut 16-it missaanniittut Nuummi sungiusaqatigisassavai, Olsen oqarpoq. Taassuma neriuutigiinnarsinnaavaa kalaallit Danmarkimi inuussutissarssiutigalugu unammisartuusut klubbiminni arsartilluarneqartarumaartut. 

Sungiusaasoq, unammisartullumi, Pan Am-imi Nuummi unamminissartik qilanaareqaat. Pisussaq angeqaaq anginerungaarsinnaananilu. 

- Angeqaaq, naluaraluunniit qanoq nassuiassallugu, Olsen oqarpoq. Taassuma kalaallit illersuisui isiginnaartoralugit aasamut unammisaqattaarnissaq qilanaaraa. 

Ingi Olsenip unammisartullu angusarinnerni pingasuni akuunissartik siunertaraat. Angusinnaagunikkumi nunarsarmi pissartanngorniuunnissamut anngutissapput. 

 

AAMMA ATUARUK PANAM2018 suliniummi aqutsisussarsisoq

 

AAMMA ATUARUK Pan Am-ertoqarnissaanut assartuinissat aningaasallu amigaataasut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat