Kalaallit Ulluat Tivolimi ornigarneqarluartoq

Allattoq Mads Lynge
aggustip 01-at 2006 17:10

Aggustip aallaqqaataa, Kalaallit Nunaata Tivolimi ulloraa.

Ullut pingasut kalaallit tivolimi nalliuttorsiutigineqareerlutik aggustillu aallaqqaataani naggaserneqassapput. Suleqatittalu Inge S. Rasmussenip, nalliuttorsiortunut malinnaasimasup, Tivoli ornigarneqarluarsimasoq oqaatigaa:

- Maani aasarissorsuuvoq, seqinnareqaaq, marlunngornerullunilu. Aggustilli aallaqqaataajummat inuppassuit ulloq naallugu tivoliliakaarrassimapput, Inge S. Rasmussen oqarpoq.

Naak ulluinnaagaluartoq inuit 28.000-it missaanniittut Tivoliliakaasimapput, inuillu takummaasut imaaginnavissimallutik.

Malik aamma Nina tusarnaartitsipput, soorluttaaq rappertartoq Lucas tusarnaartitsisimasoq.

Erinarsoqatigiit NIPE tusarnaartitsisunut aamma ilaapput.

Peqatigiiffik Kalaallit Nunaat Tivolimi aaqqissuussisuuvoq, siulittaasuallu Sidsel Møller oqarpoq, ukioq manna aaqqissuussineq isertitakiffiunerusimagaluarluni iluatsilluartoq.

Kalaallit Nunaata Tivolimi nalliuttorsiutigineqartarnera suli ulluni pingasuni ingerlanneqartassasoq, Sidsel Møllerip siunnersuutigaa, ullulli siulliit marluk takornarianut sammitinneqarnerusinnaasut eqqarsaatersuutigalugu, taamaasilluni Kalaallit Nunaat takornariarfissatut nittarsaalluarneqarsinnaassammat.

Nipilersoqatigiit Zikaza Plænenimi tusarnaartitsisussanut ullumi aamma ilaapput.