Kalaallit tunngaviusumik inatsisaanni suut ilanngutissallugit pingaaruteqarpat?
Inuusuttut Inatsisartui ataasinngormamiit tallinngorneq ilanngulugu ataatsimiipput.
Inuusuttut inatsisartui sapaatit akunneranni uani katerisimaareerlutik ataatsimiinnertik tallimanngormat naggaserpaat
”Kalaallit tunngaviusumik inatsisaat. Kalaallit tunngaviusumik inatsisaanni suut ilanngutissallugit pingaaruteqarpat?” Tassa apeqqut inuusuttut Inatsisartuisa pingaarnertut sammisaat.
- Kalaallit piorsarsimassutsikkut naleqartitaat eriagisassatut ilanngunneqarnissaat, Inuusuttut Inatsisartuini eqimattat siullermeersoq Julia Lynge Ezekiassen taama oqarpoq.
Peqataasut eqimattanut sisamanut agguataarneqassapput eqimattallu ataasiakkaat Inuusuttut Inatsisartuinut pingaarnertut qulequtaritinneqartoq, isummat illuatungeriittut sisamat siumut aalajangiunneqareersut aallaavigalugit, sammissavaat.
Lisa H. Petersen Inuusuttut Inatsisartuanni ilaasortaq eqimattat aapaanneersuuvoq, taannalu namminersulivinnissamut suli ungasittoq isumaqarpoq.
- Ingerlaannaq namminiilivissinnaanngitsutut taasinnavara, pissutigalugu inuaqatigiinni aaqqitassat alloriarneq ataasiakkaaraluni aamma ingerlasoqartariaqarami innuttaasut eqqarsaatiginerullugit, Lisa H. Petersen KNR-mut oqarpoq.
Inuusuttut namminneq isummersinnaalernissartik taakkuninngalu oqartussaaqataanermi maleruagassat tunngavigalugit illersuisinnaanissartik ulluni tallimani ataatsimiinnerminni ilinniarpaat, Lisa H. Petersenilu ilikkagaqaqaaq:
- Ataatsimiinnerput tamaat isigissagaanni Kalaallit Nunaat tamakkerlugu politikkikkut oqallinneq inuit allat isumaat aamma toqqammavigalugit paasisaqarnartorujussuuvoq. eqqarsaatiginngitsuukkat nutaat takkuttarmata paasisanik immersorneqarluta pivugut, Inuusuttut inatsisartuini ilaasiortaq Lisa H. Petersen taama KNR-mut oqarpoq
Inuusuttut inatsisartuini 24-30-llu akornanni ukiullit peqataapput.
