Kalaallit Tjekkiami Tae Kwon-Domi pissartanngorniuteqataalerput

Kalaallit Tae Kwon-Do-mi unammisartui Czec Openimi peqataassallutik Tjekkialiarput. Peqataasussat arfineq pingasut Europami unammersuarnissamut Italiap kujataani Barlettami marsimi pisussamut unammineq piareersaatitut atorniarpaat.
februaarip 10-at 2010 14:01

Qanoq angusaqassanersut pissanngatigisorujussuuvagut, tassami Tjekkiarmiut pikkorissorujussuupput, Europami nunarsuarmilu pissartanngorniuutivinnerni pikkorinnerpaat pingasut akornanniittuaannarput, nunatsinnut sungiusaasoq Lauritz Heilmann oqarpoq.

Ukioq manna Czec Openimut unammisussat 256-it missaanniipput, unamminissallu februaarip aqqaneq aappaanni aqqaneq pingajuannilu ingerlanneqartussaapput. Nunat peqataasussat katillutik aqqaniliunissaat naatsorsuutigineqarpoq.

Nunani avannarlerni januaarimi unamminissaagaluit taamaatiinnarneqarput, nunanit allanit unammisussaqannginneq peqqutaalluni. Unammersuarnerit Ilulissani ingerlanneqartussaagaluarput, peqataarusullutilli nalunaarnikut nunatsinnut angalanerup akisuallaarnera peqqutigalugu tamarmik peqataaniaratik nalunaarput.