Kalaallit Tivolimi naapinnissaannut aningaasassaaleqipput

Allakkat tammarnerat aamma aningaasateqarfimmut NunaFondimut qinnuteqaatip itigartitsissutigineqarnera kalaallit Tivolimi aaqqissuussinissaannut annikillisaataapput.
Allattoq Jaaku Lyberth
maajip 12-at 2011 12:20

Missingersuutit ukiormannamut atuuttut aatsaat taamak ikitsigipput, peqatigiiffimmi Kalaallit Nunaat Tivolimi-mut siulittaasoq Sidsel Møller taaama oqaluttuarpoq.

- Tivolimit taperneqarpugut, tassalu ukioq manna aningaasassagut taakkuupput. Namminersorlutik Oqartussat kulturikkut aningaasaliissutaannit Nunafondimilluunniit ukioq manna pissarsinngilagut, Sidsel Møller oqarpoq.

NunaFonden siorna aamma tapiinngilaq, tassalu tamanna nutaarsiassaanngilaq. Namminersorlutilli Oqartussat kulturikkut aningaasaliissutaannit tapeerusunnginneq peqqutaanngilaq. Tassami peqatigiiffiup Kalaallit Nunaat Tivolimi-mi siulersuisuisa aningaasaateqarfimmut qinnuteqaat januaarimi nassiussaat apuussimanngilaq.

-  Suna peqqutaanerpa. Allakkerivimmi ajutoortoqarsimanerpoq allamilluunniit pisoqarsimanerpoq.  Kisianni killiffitsinniit ingerlaqqittariaqarpugut, Sidsel Møller oqarpoq.

Ukioq manna missingersuutit 300.000 koruuniusut, Sidsel Møller ilisimatitsivoq. Tassalu  siorna atorneqartunut naleqqiullugit ikinneroqaat, siorna 500.000 koruunit atorneqarmata siornaallu 2009-mi 800.000 koruunit atorneqarlutik.

Aningaasat ikilinerujussuat aaqqissuussinermut sunniuteqassaqaaq.

- Ukioq manna aaqqissuussinerit ikittuinnaassapput. Eqqumiitsuliortut amerlanerusut peqataatinneqarnissaannut akissaqanngilagut. Eqqumiitsuliortut Danmarkimiiittut kisiisa attartortariaqarpagut, akissaqarnerlu apeqqutaatillugu, Kalaallit Nunaannit tikisitsissaagut, Sidsel Møller oqarpoq.

Aningaasaqarnikkut nalorninartorsiorneq pissutigalugu pingaarnertut aliikkusersuisussaagaluaq takkutisanngilaq.

- Aningaasaateqarfiit qinnuteqarfigisagut kingusinaarlutik akimmata, aningaasatigut nalorninartorsiorpugut. Tamaammat pingaarnertut aliikkusersuissussatut piukkussarput neqeroortumut allamut akuersiinnartariaqarsimavoq, Sidsel Møller oqarpoq.
Siulittaasorli neriutaarutivinngilaq.

- Qanorluunniit ikkaluarpat inuit Tivolimi naapinnissamut qilanaarput. Nuannaarlutik naapinniaramik takkuttarput, aaqqissuussinerillu naapinnernut ilassutaasarput. Kalaallit Nunaat Tivolimi sinnerlugu siulittaasuaa Sidsel Møller taama oqarpoq.

Taanna kissaateqarpoq, peqatigiifiup aaqqissuussinernut aningaasaqarnera ukioq ataaseq sioqqullugu inissereersimasassasoq, ukioq maannatut ajornartoorneq uteqqinnginniassagamikku.

Kalaallit Tivolimi naapinnissaannut pilersaarutit suli naammassineqanngimmata, pisussat pillugit Sidsel Møller oqaaseqarsinnaanngilaq.