Aliikkusiartarfik Tivoli Kalaallit Nunaannut tunngassutilinnik juulleriartornerani malunnartitsiniarpoq, sapaatip-akunnerinilu arfineq-marlunni juullerpalaartitsinissamut matut aqagu ammarneqassapput. Illuaraq kalaalerpaluttoq, tuniniaaviullunilu aliikkusersuiffiusussaq, Ajaja Design Greenland Travelilu suleqatigalugit KNI-p Tivolip ilaaniitinniarpaa.
KNI-p tuniniaanermut pisortaa Kurt Lauridsen oqarpoq, Neqi aamma Arctic Green Food kalaaliminernik assigiinngitsunik avammut tuniniaanissaannik isumaqatigiissuteqarfiusimammata taama suleqateqarnissaq iluarinartoq.
- Tivoli aqqutigalugu Kalaallit Nunaat ilisaritissallugu kusanarluinnarpoq. Eqqumiitsuliat, tunissutissat, umimmaat savallu neqaat aalisakkallu pilerisaarutigineqassasut isummiunnikuuvarput, Kurt Lauridsen oqarpoq.
“Kalaallit illuutissaata” pilersinniarneqarnerani inuit 20-t missaanniittut peqataassapput. Ingerlatsisussanut ilaavoq, Kalaallit Tivolimi Peqatigiiffianni siulittaasoq Sidsel Møller. Taanna oqarpoq, pingaartumik juullip qaammataani sapaatip-akunnerisa naanerini assigiinngitsunik aaqqissuussisoqartassasoq.
- Pisussat iluamik suli pilersaarusiunngilavut, pilersaarutinulli ilaavoq Vivi Nielsen uaajeertinneqassasoq, Erinarsoqatigiit MIK juullisiutinik tussiassapput aamma Nina Kreutzmann Jørgensen uinilu Malik aliikkusersuissallutik.