Kalaallit Tivolimi

juulip 30-at 2005 16:51

Københavnimi Tivolimi kalaallit festivalernissaat ulluni pingasuni ingerlanneqartussaq Danmarkip nalunaaqutaa malillugu marlunut ammarneqarpoq. Ataasinngornerup tungaanut erinarsoqatigiit Aavaat nipilersortartullu assigiinngitsut, soorlu; Angu Motzfeldt, Aviaaja Lumholdt kiisalu Julie Berthelsen Tivolimi tusarnaarneqarsinnaapput. Taamatuttaaq kalaalimerngit soorlu umimmaat neqai, savap neqai aalisakkallu panertut sassaalliutigineqassapput.

Tivolimi kalaallit taama naapittarneranni ukiup aappassaa ullut pingatserlugit ingerlanneqassaaq. Siorna Namminersornerullutik Oqartussat ukiut 25-inngortorsiornerannut atatillugu Tivolimi kalaallit naapisimaarnerat ulluni pingasuni ingerlanneqaqqaarpoq.

Ataasinngorpat unnukkut Julie Berthelsen festivaalimik matusereeriarpat inuit qassit takkussimanerat paasinarsissasoq oqaatigineqarpoq, kalaallit Tivolimi siorna naapisimaarneranni inuit 103.000-t peqataasimapput.