Kalaallit tingulluttunut annaassisalersinnaasoraat

marsip 04-at 2007 17:02

Ukiualunnguit qaangiuppata kalaallit nunarsuarmi inuppassuit taamannat millionit inuunerannik annaassisinnaalissapput. Kalaallimmi immikkuullarissusermik peqarput. Tingullunneq nunarsuarmi inuppassuarnit nappaatigineqartarpoq assullu toqussutigineqartarluni, kalaallinulli tamanna atuutinngilaq.

Kalaalerpassuit tingullunnermik tunillanneqartaraluarput sumilli peqquteqarsimagunartumik napparsimalissutigineq ajorpaat. Tamanna nunatsinni misissorneqarsimavoq maannalu nakorsaatinut tunngatillugu Århusip universitetiani ilinniartup Karsten Fleischer Rexip misissornialerpaa kalaallinut Danmarkimi najugalinnut aamma atuunnersoq.

-Siullermik paasiniarsarissavarput inuit Danmarkimi najugaqarnerminni tingullunnermik tunillanneqarsimanersut. Paasiniassavarputtaaq kalaaleq Danmarkimut nuussimaguni danskisullu inuulerluni kalaallinut nunatsinni najugalinnut qanoq assigiinngissuteqartiginersoq. Soorlu nerisaasa timaanut qanoq sunniuteqaqataasimatiginerat paasiniassallutigu, imaluunniit virusit allarluinnaat peqqutaallutik virusi pilersarpa? Imaluunniit virusi taanna nunagisamiit aallaqqaarnermiit ilumut pigereerneqartarpa? Karsten Fleischer Rex oqarpoq. Taanna aperaarput kalaallit sooq tingullunnermik napparsimalertannginersut qanorlu tamanna nassuiaasersinnaaneraa.

-Imaassinnaavoq nerisat imaluunnit timip kingornussaanniit aallaaveqarsimasinnaasoq. Aamma ukioqqortusereerluni virusi timimiilersimappat taava virusimut tassunga akiuussutissaq annertunerulersimasinnaavoq, taamaalilluni virusi taanna napparsimalissutigineqanngitsoortarluni, oqarpoq.

Taanna aperaarput siunissaq eqqarsaatigalugu sooq kalaallit tingulluummik tunillanneqartannginnerat paasineqassagaluarpat paasisaq tamanna qanoq atorneqassagaluarnersoq.

- Atorluarneqakutsoorsinnaavoq tassami virusi hepatitis B nunarsuarmi toqussutaajuartuuvoq, qularnanngilarlu atorluarneqalerumaartoq nunarsuarmullu arlaatigut iluaqutissatut tuniniarneqalersinnaassasoq, taamaalillunilu inuppassuarnik annaassisinnaassalluni, Karsten Fleischer Rex oqarpoq.

Taassuma nakorsaq Stig Andersen tamatuminnga suleqatigaa.