Kalaallit timaat PCB-mik akoqarnerpaapput

Puisit nannut arferillu neqaanik nerisartut naartusinnaaneri akuttunerusartut, ukiuni arlaqartuni misissuisoqareersorlu paasineqarpoq. Nunarsuaq tamakkerlugu inuiaqatigiit peqqissusaanik misissueqataasimasoq Danmarkimi najugalik ilisimatooq Gunnar Toft ima oqarpoq:

- Nunarsuarmi inuiaqatigiit assigiinngitsut misissuiffigineqarneranni, nerisassat akuini PCB-mik DVI-millu taaneqartartunik nerisarisartakkat akoqarpallaaraangata arnat naartulersinnaaneranik kinguarsaasartut ilimagineqalerpoq. Taama oqarpoq Gunnar Toft, Department of Occupational Medicine-mi ilisimatuutut atorfilik.

Kalaallit Nunaanni najugaqartut puisit nannut arferillu neqaanik nerisaqarluartartut, timaat PCB-mik akoqarnerusarput, misissuinermilu paasineqarpoq, Kalaallit arnat kalaaliminertorluartartut naartuniartarnerat ajornakusoornerusartoq.

- Misissuineq suli ingerlavoq, iluamillu uppernarsivillugu oqaatigineqarsinnaanngilaq ilumut Kalaallit Nunaanni arnat timaasa PCB-mik akoqarpallaarneri pissutaallutik naartulerniartarneri ajornakusoornerusartut, kisiannili taamaassangatinneqarpoq, Gunnar Toft oqarpoq.

Uumasut miluumasut imarmiut neqaasa PCB-mik akoqalersimaneranik pissutaanerpaanut ilaavoq, suliffissuit PCB-mik akulinnik siusinnerusukkut imaanut mingutsitsisarsimanerat. Maannakkut nunarsuarmi sumiiffiit amerlanersaani PCB-mik akulinnik atuisarneq inerteqqutaavoq.

- Kalaallit Nunaaniinnaanngitsoq nerisassat akuini PCB-mik akoqarnerat ajornartorsiutaanngilaq, aamma Europami nunarpassuarni nerisassat PCB-mik akoqarput, kisiannili Kalaallit Nunaata imartaani uumasut miluumasut neqaat PCB-mik akoqarnerpaapput, Gunnar Toft naggasiivoq.

Gunnar Toft aamma oqarpoq Kalaallit Nunaanni najugallit kalaaliminertunnginnerusartut timaat PCB-mik akoqannginnerusartut.