Kalaallit timaat katersugaasivimmiiginnassappat?
kalaallit ukiut 500-t matuma siorna toqusimasut timaat maanna Danmarkimi nunatsinnilu katersugaasivimmi takusassiarineqartut, takusassiarineqaannassappat? Imaluunniit ataqqinarnerusumik pineqartariaqarpat?
Nunat inoqqaavisa eriagisat utertinneqarnissaat pillugu ataatsimeersuarneranni ullumi Aqqaluk Lynge ilaatigut taama saqqummiinermini aperivoq.
- Assersuutigiinnarlugu nunatsinniit aallarunneqarsimasut timit 200-t sinnerlugit massakkut Danmarkimi Pano instituttimiipput, taakkulu nunatsinnut utertinneqarsinnaanngillat inissaqannginnerat qanorluunniit pissanerigut nunatsinni eqqartunnginnatsigu. Taamaattumik apeqqutigisarput uagut unaavoq, kalaallimmiuna qanoq siuaasatsinnut tunngasut qanoq iliuuseqarfiginiarigut? Ilumut akueriinnassavarput timit paniinnarnikut ukiut 500-t matuma siorna inuusimasut massakkut taamak saqqumitigisumi katersugaasivimmiitissavaguut? Imaluunniit allatut ataqqinarnerusumik inissinneqassappaat? Tamakkorpassuupput kalaallit namminneq oqallillutik aalajangersarniagassaat allat saaffigitinnagit, Aqqaluk Lynge oqarpoq.
Taanna aperaarput ataatsimeersuaqataasut saqqummiussuinerat eqqarsaatigalugu maluginiarsimaneraa eriagisanut tunngatillugu nunat sorliit kinguarsimanerunerat.
- Kinguarsimaneq siuarrsimanerluunniit eqqaassagutsigu kalaallit kinguarsimangaatsiarpugut kristumiuussutsip siorna pigisagut eqqarsaatigalugit tassani eriaginninneq annikitsuararsuugami. Oqaluttuarisaaneq naluarput aatsaat misissorlugu aallartipparput, aammalu siulitta upperisaat allallu nunamiittut aammalu ilisaasut qanoq ataqqineqarlutik pineqarsimanerat ullumikkut ataatsimiivilluunniit eqqartorunnaarnikuuagut naluleratsigit, Aqqaluk Lynge oqarpoq.
Nangipporlu:
- Taamaattuminguna uterfigisariaqarigut qanoq ililluta tamakkua ataqqinassuseq uterfigissagutsigu aammalu kalaallit inuiattut namminneq imminnut ataqqinassusaat oqaluttuarisaanitsinnillu pissarsiarisinnaasagut ullumikkut anersaakkut nukittuutigisinnaasagut tamakkua ujartorniarutsigit taava qanoq iliussuugut? Eqqarsaatigisariaqalerparput ukiut 500-t matuma siorna ajunaarlutik toqusimasut qanoq ilillugit taava takusassiarissavagut taamatut? Misissorneqareerput atisaat takoreerpagut qanoq ilillunilu tamanna aaqqinneqarsinnaava? Aqqaluk Lynge oqarpoq.
Aqqaluk Lynge aamma oqarpoq avataaniit tikittut avammut nassatassanik kaasarfimmiulerlutik aallakaasaqimmata tigusisarneq kalaallit akornanni eqqartorneqarnerusariaqartoq.
- Uagut nunanut allanut tikikkaangatta taamarsuaq misissorneqartarpugut aamma takornartat nunatsinnut tikittut qanoq annertutigisumik annissuinersut upalungaarneqartariaqarpoq, Aqqaluk Lynge oqarpoq.
