Kalaallit tapersersortaat aalajaatsoq
![](/sites/default/files/styles/image_934x467/public/article_images/reddington_630.jpg?itok=WG2NtUv-)
Inuit tupaallattaqaat angut tuluppasissoq kalaallit erfalasuannik Island Gameseqarnerani aalaterisoq takugaangamikku. Aamma kalaallit timersortartut peqataarngaartut takugaangamikku tupaallattarput allat peqataareersimasut ilisarsiffigisaraat.
Takusartagaat tassaavoq David Reddington Jersey-meersoq 1997-miilli Island Gameseqartarnerani kalaallinik illersuiartortartoq.
- Qangali Kalaallit Nunaat takorusuttaraluarpara. Taamaammat kalaallinik illersuiartortarpunga, David Reddington KNRimut oqarpoq.
Taanna qungujuinnartarpoq aperineqaraangami qeqertaq angerlarsimaffini Jersey 90.000-it sinnerlugit inulik sooq illersunnginneraa.
- Jersey-mi inoqaqaaq, taamaammat timersortartuvut illersorneqassaqqaarput. Uanga kalaallit illersorusunneruakka, David Reddington kalaallit erfalasuannik nassarluni unammiffinnut assigiinngitsunut angalaaqattaartoq oqarpoq.
Qujaniarfigalugu timersoqatigiit kattuffiata kalaallit Island Gamesimi tujuuluararisaannik tunissimavaat inuttaata tulluutingaarluni tigusimasaanik.