Kalaallit takutitsissapput issittormioqatigiit unammiuaalerpata
Taamaattumik NAPA-mi pisortaq, Anders Berndtsson, Grande Prairiemut, atortorissaarutit kulturimut tunngasut suut 2010-mi atorneqassanersut takuniarlugit tikeraaqqammerpoq.
Issittumimi nunallit unammiuaaqatigiinneranni kalaallit kulturimut tunngassuteqartunik takutitsinissaanni NAPA aaqqissuisuussasoq, Timersoqatigiit Kattuffiannit aammaarluni aalajangiunneqarpoq.
Nunat issittormiut Yellowknifemi siorna unammiuaarmata NAPA iluatseqisumik aamma aaqqissuussivoq, Canadamilu aaqqissuussisut oqarnerat naapertorlugu, Kalaallit Nunaat 2010-mi immikkut illuinnartunik aamma takutitsisussaavoq.
Nunanimi Avannarlerni Piorsarsimassutsikkut Attaveqaammit, NAPA-mit, eqqarsaatersuutigineqarpoq, kalaallit Sydafrikamiullu erinarsoqatigiit kattullutik aliikkusersueqatigiissillugit takutitsinersuaqassasoq!
- Uagutsinnut Kalaallit Nunaanni najugaqartunut pingaaruteqarpoq, inuusuttut nunat issittormiut unammiuaarneranni immikkut illuinnartumik misigisaqartissallugit, Anders Berndtsson oqarpoq. Taanna 2010-mi takutitsinissarsuarmut scenemi aqutsisussamik, qullerisussamik nipilerisussamillu pissarsereersimavoq.
