Nunat avannarliit taekwondorlutik Finlandimi pissartanngorniuteqqammerput, nunattalu unammisartui angusarissaarluinnarsimapput.
Taekwondortartut nunatsinneersut 22-upput, katillugillu 58-inik ujaminnassimallutik.
Siorna pissartanngorniuttoqarmat kalaallit 51-inik ujaminnapput, ukioq mannalu tassa qaangerneqarluni.
Ujaminnattaat 35-t kuultiupput, taekwondortartullu nunatsinneersut tamarmik ujaminnassimapput.
Ukioq manna pissartanngorniunnerni Kalaallit Nunaat angusarissaarnerpaatut toqqarneqarpoq.
Norgemiut taekwondortartut 33-iusimapput, Sverigemeersullu 30-usimallutik. Finlandimiut 50-init amerlanerusut pissartanngorniuteqataapput, Danmarkilu qulinik peqataatitaqarsimalluni.