Kalaallit Taekwon Do-rtartut arlalinnik ujaminnapput
Kalaallit Taekwon Do-rtartut ataatsimik kuultinnapput, sølvi ataaseq bronze-llu pingasut pingasunngornermi februaarip 23-at Europami pissartanngorniunnerit aallartimmata.
Utoqqasaat tul-imi unammineranni Christian Isaksen pissartanngorpoq ullorlu naarianngitsoq frikampimi aamma sølvinnalluni.
Angutinnguaq Tittussen tul-imi finalemut anngutingajalluinnarpoq semifinale-mili dommerit taasineranni 2-3-mik ajorsalaarluni taamalu bronze naammagiinnartariaqarlugu.
Lauritz Heilmann qernertumik qiterutillit 5. danimiittut Europami pissartaanermik illersuisoraat. Piffissarli kingulleq qitimigut ippigisaqarsimavoq aammalu finale angunngitsoorlugu. Lauritz Heilmann tul-imi bronzennappoq.
Qernertumik qiterutillit 2. dan-imiittut unammimmata Sten Rasmussen tul-imi bronzennappoq.
- Ulluni tulliuttuni unammersuarnerit ingerlaqqissapput tassani kalaallinit peqataaffigineqassallutik frikamp, iligiiaarluni frikamp aamma powerbreaking. Unammeriaatsini taakkunani kalaallit periarfissaqarluarput ujaminnannissamut ullumilu ujaminnattarnermi imminut upperineq qaffariangaatsiarpoq, nuna tamakkerlugu sungiusaasoq Lauritz Heilmann nalunaarpoq.