Foto: ToqqorsivikAssi: Anders Hviid/ft.dk

FOLKETINGIMI Kalaallit sunniuteqarniarnerat

Aaja Chemnitz Larsen (IA) aamma Aleqa Hammond (S) kalaallit Folketingimi sunniuteqarnerunissaat sukataarnarnerpaasimasutut tikkuarpaat.

Folketingimi ilaasortat suliassat annertuut soorlu uran pillugu inatsisit, angajoqqaat akisussaaffii, suiaaqatigiillu Kalaallit Nunaanni katissinnaanerat ukiumi kingullermi oqaluuserisimavaat.

Taamaakkaluartoq folketingimut ilaasortat nunatsinneersut tamaviaarutigisaanni annerpaasimavoq sulianut Kalaallit Nunaannut tunngasunut sunniuteqalaarsinnaaneq.

Aamma atuaruk Venstrep naalakkersuisuutitaqarnerata ukiua siulleq isorineqartoq

Christiansborgimi Kalaallit Nunaat pillugu ukiumi kingullermi politikkikkut angusaqarluartoqartarsimasoq, Inuit Ataqatigiit folketingimut ilaasortaatitaat Aaja Chemnitz Larsen isumaqarpoq.

- Eqqartuussiveqarnermi illersuisoqarfik pilersinneqarsimavoq. Ilaqutariinnut eqqartuussivik iluarsaqqinneqarsimavoq. Illersornissarlu eqqarsaatigalugu aamma arlalinnik pisoqarsimasoq isumaqarpunga.

Ajugaaneq

Suleqataata Aleqa Hammondip Siumumeersup uran pillugu isumannaallisaanissat inatsisitigut akuerineqarsimasut erseqqissaatigai, Kalaallit Nunaannut Namminersornermullu ajugaanertut.

- Kalaallit Nunaata pingaartitai. Amerlanerussuteqartut aalajangingaat pillugu Christiansborgimi politikerit nersualaarpai.

Naallu Folketingip inatsisit ilaqutariinnermut tunngasut oktobarimili suliarisimagaluarai, inuup normui pillugit inatsit, suiaaqatigiillu katissinnaanerannut tunngasut Aleqa Hammondip politikkikkut ajugaanertut toqqaannartumik taarusunngilai.

- Qinigaaffimmi ukiuni sisamani sivisussuseqartumi ukiumi siullermi politikkikkut angusaqarujussuarsimanermik oqassalluta mianersuutilaartariaqarparput, naalakkersuisunimmi aggersarneqarsimanngilagut.

Aamma atuaruk Folketingimi amerlanerussuteqartut urani pillugu inatsisissat akuersaarpaat

Folketingimut juunimi qinersinerup kingorna unammillernarnerpaasimavoq sulianut Kalaallit Nunaannut tunngasunut sunniuteqarnissaq, folketingimut ilaasortat marluk isumaqarput.

Aningaasaqarneq pillugu isumaqatigiinniarnernut, politeeqarneq pillugu isumaqatigiissummut, danskit Syriami sorsoqataanerannut timmisartunilluunniit marlersuutinik pisinissamut ilaasortaq Atlantikup avannaaneersoq ataaserluunniit peqataatinneqarsimanngilaq.

Tamanna ukiup ingerlanerani tamaviaanarsimavoq isornartorsiorneqartarsimaqalunilu Aleqa Hammond oqaluttuarpoq.

- Nersualaarneqassagutta tassaasariaqarpoq naalakkersuisut eqqaasittuartaratsigit partiit tamarmik, aamma Atlantikup avannaamiut peqataatinneqarnissaat qanoq pingaartigisoq.

Taamaattumik folketingimut ilaasortat marluullutik isumaqarput ataatsimeeqqilerunik allannguisoqarumaartoq, ministerimmi arlallit neriorsuisimapput.

- Malinnaasimagaanni aningaasaqarnermut ministeri ministeriunerlu oqaluttarfimmiit neriorsuisimapput malinnaatinneqarumaartugut, kingulliulluni Aaja Chemnitz Larsen taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat