Kalaallit suliffiutaat ineriartorsinnaanerupput qallunaat suliffiutaannit

Kalaallit Suliffeqarfiutaat ilaatigut danskit suliffeqarfiutaannit ineriartornikkut ingerlalluarnerisa ingerlaannarnissaat pingaaruteqarpoq. Taama oqarpoq suliffeqarfissuup nunarsuaq tamakkerlugu siunnersuisoqarfiusup, Grontmij Carl Brop immikkoortortaani pisortaq Hans–Martin Friis Møller, Katuami ataatsimeersuaqataasut ilaat.

- Suliffeqarfiit pillugit ataatsimeersuarnissamut atatillugu peqataasussat Kalaallit Nunaanni suliffeqarfiit qanoq ingerlanersut apeqqutinik nassiussiffiginikuuagut, soorlu aamma Danmarkimi suliffeqarfiit taamatorluinnaq iliorfigineqartut. Misissuinitsinni akissutit aallaavigalugit Kalaallit Nunaanni suliffeqarfiit amerlanerit Danmarkimi suliffeqarfinnit ineriartornikkut ingerlalluarnerusut takusinnaavarput. Taamaattumik piginnaaneq annertooq kalaallit ineriartorteqqillugu ingerlattariaqarpaat attavissallu annertusarlugit, Hans-Martin Friis Møller oqarpoq.

Qanoq ineriartornikkut piareersimatigippat ?

Sorpiaat ineriartortikkusunnerlugit nalunnginneqartariaqarpoq isumassarsianillu qaffakaasoqartuaannarnissaa pingaaruteqarluni.

Taamaakkaluartoq aporfissaqartuaannarpoq. Suliffeqarfinnillu ineriartortitseqqinniarnermi sulisussakinneq aporfiit ilagikkajuppaat.

Tamakkuuppullu maanna ataatsimeersuarnitsinni qimerluugassagut, taamaalilluta suleriaatsimik suliffeqarfippassuit atorsinnaasaannik nassaarsinnaagatta. Minnerunngitsumillu kalaallinik ilinniarsimasunik suliffeqarfeqalertoqarnissaa siunniuttariaqarpoq. Inuiaqatigiinni ilinniarluarsimasut amerlanerujussuusariaqarput, tamanna aamma suliffeqarfinnut apeqqutinik nassiussisarnitsinni pingaartinneqarpoq. Hans–Martin Friis Møller oqarpoq.