Kalaallit suliffeqarfiutaat 34-t Torontolialerput

Aatsitassat pillugit nunat tamalaat ataatsimiinneranni PDAC-mi Torontomi pisussami ukioq manna aammaarlutik kalaallit suliffeqarfiutaat peqataanissaminnut soqutiginnertik takutipaat, ataatsimiinneq marsip pingajuanniit arfernannut ingerlassaaq. Soqutiginnittut PDAC-mut peqataaffigisinnaasaat ukiut tallimassaat Sulisitsisut aaqqissorpaat – ukiorlu manna 54-it angalaqataassapput.
Allattoq Peter Troelsen
marsip 01-at 2013 10:20

Taassuma saniatigut Canadami danskit aallartitaat H.E. Ering Vilstrup Lorentzen angalaqatigiit naapissinnaassavaat, aammalu VR Rejser, Torontomi immikkoortortaqalersimasoq pulaarsinnaassallugu.

Sapaammi marsip pingajuanni Greenland Business Event-imut Sulisitsisut qaaqqusisuussapput. Ulloq taanna arlalinnik saqqummiisoqassaaq: Danskit Canadami aallartitaat peqataassaaq, Henrik Fenger Jeppessenip Asiameersup Kalaallit Nunaanni aatsitassanik ujarlernerup ukiuni qaangiuttuni ingerlaasaa oqaluttuarissavaa, taavalu Sulisitsisut pisortaata Brian Buus Pedersen-ip ulloq taanna pisoqartitsinermi sammisaq pillugu suna anguniarneqarnersoq sammissavaa, matumani pineqarluni suliffeqarfiit avataaneersut Kalaallit Nunaanni inuussutissarsiortunut sunik isumalluaateqarnersut. Sivikitsumik unillatsiareernerup kingorna MT Højgaard Grønlandimeersup Kim Ulrik Hansen-ip kalaallit suliffeqarfiutaasa misilittagaat aammalu Kalaallit Nunaanni suleqatissarsiortarnermi misilittakkat oqaluttuarissavai. Tamanna pereerpat London Mining-imeersoq Xiaogang Hu Nuup Kangerluni Isukasiani suliniut pillugu naatsumik saqqummiissaaq. Naggasiullugu angalaqataasut ilisaritinneqassapput – ullorlu pisoqarfiusoq nuannersumik ilasseqatigiinnermik naggaserneqassalluni.

Torontomiinnermi ullut sinneri Kalaallit Nunaannit angalaqataasut ataatsimiinnermi PDAC-mi peqataassapput imaluunniit saqqummersitsivinniissallutik, tassami Sulisitsisuni ilaasortat tamarmik peqataaffigisaannik Sulisitsisut saqqummersitsiveqartussaammata.