Kalaallit suliaritikkiartortussat eqqugaapput
Dronning Ingridip Napparsimavissuaniit Danmarkimut nakorsiartitassat ataasiakkaarlugit ilumut nakorsiarsinnaanersut suliarineqarsinnaassanersullu paasiniartariaqartarpaat.
- Tassa imaappoq: Nakorsiat inuunerat navianartorsiortutut tuaviuuttariaqanngitsutullu nalilikkat salliutinneqartussaasut kalerritereerpugut. Taamaammat tuaviuussassaanngitsutut aallanngitsoortittariaqarpavut, oqarpoq.
Maannamut inuit tallimat missaanniittut Danmarkimi suliumajunnaartoqalerpat sullississussaqanngimmata aallanngitsoortussatut nalilerneqareerput.
Søren Rendal aamma oqarpoq, ullut tulliuttut takutikkumaaraat assersuutigalugu Rigshospitalimi suliumajunnaarnerit kalaallinik nakorsiartussanik qanoq eqquitigissanersut.
Kinguartitsisoqassatillugu misissortittussat suliaritittussallu ataasiakkaat ingerlaannarlutik nalunaarfigisarumaaritik, Dronning Ingridip Napparsimavissuani pisortap ilanngullugu oqaatigaa.
