Kalaallit spejderit Narsarsuarmi tammaarsimaarput
Spejderit Frankrigimeersut, Savalimmiuneersut Nunatsinneersullu 37-it Narsarsuarmi "Hospitalsdalenimi" ulluni makkuni tammaarsimaarput. Spejderit tallimat Frankrigimi St Exúperu Groupimeersut, spejderillu Qaqortumi Narsamilu gruppeneersut 18-it peqataapput.
Allattoq Peter Troelsen, Simon Uldum
Tammaarsimaanermi juulip 28-iata tungaanut assigiinngitsorpassuarnik sammisaqassapput, orienteringsløb, qajartorneq, erinarsorneq, ikumaartitsineq spejderillu pinnguaataat.
Tammaarsimaarfik alianaalluinnartumi Hospitalsdalimiippoq, tatsip eqqannguani. Tassani aamma inuit pinnguaataannik misileraasoqaassaq, eqalunniartoqalruni aammalu hiistertoqarluni. Aamma spejderit juulip 29-iani angerlaqqittussat sermersuarmut pisuttuassapput allarpassuarnillu sammisaqassallutik.