Kalaallit snowboardertartut DM-imi angusarissaaqaat
13-inik ukiulik Alataq Karlsen kuultinnappoq, 15-inik ukiulik Mathias Mark siilvinnalluni, 15-inillu ukiulik Niklas Pederseni bronzinnalluni. Tamarmik Nuumminngaanneersuupput.
Nunatsinni ataatsimut isigalugu ukioq manna aputaasappoq, sisorartunullu tamanna soorunami sunniuteqaraluartoq, snowboardertartunut, sisorartartunullu kinguneqarnerlutsitsisimanngilaq:
-Nuummi majurtaammi minnermi sungiusarsinnaasimavugut, isumataassarsiorlutalu nasssaartorsinnaasimavugut. Nammineq atortutsinnik atuilluta tinngallaliortarpugut, ikioqatigiittarlutalu. DM-ilu sioqqulluga taamaalilluta sungiusalaarsinnaasimalluta, Mathias Mark, unammiartortuni kisiartaalluni Elite Sport Greenlandimit aningaasalersorneqartoq oqarpoq. Taanna aamma Royal Greenlandimit aningaasalersorneqarpoq, snowboardinillu tunisassiortartunit Bataleon Snowboardsimit aamma tapersersorneqartarluni.
Nunatsinnit unammiartortut sinneri Kommuneqarfik Sermersuumit aningaasatigut tapersersorneqanngikkunik namminneq akiliisimapput.
Unammeriaaseq boardercross ullumi unammissutigineqarpoq, kalaallillu juniorit marluk medaaliannapput, tassa Mathias Mark kuultinnakkami, Jonas Strømstedilu, aamma Nuummeersoq, siilvinnalluni.
Angunitini inersimasuni Aputsiaq Kristiansen, Tasiilameersoq, ajugaallualaavippoq, unammillertini finalimi ajugaalluarfigigamigit.
Unammeriaaseq Big Air, Aputsiaq Kristiansenip nuannarilluarpaa, DM-ilu aqagu naggaserneqalerpat taanna unammissutigineqassalluni. Big Air tassaavoq tinngallarujussuakkut tinngallattaarneq.
Mathias Mark angutaa Ole Mark, DM-imik malinnaajartorluni peqataavoq, snowboardertartullu kammalaatiminnik naapitaqarnerat iluaqutaalluinnarsoraa:
-Ikinngitinik naapitaqarnissaat pingaaruteqarpoq. Siorna pissartanngorniunnerni ikinngutigilikkatik naapippaat, ulluinnarnilu aamma attaveqaqatigiittarlutik, tapersersoqatigiittarlutik, Ole Mark oqarpoq.
