Kalaallit semifinalemi ajorsarput
Kalaallit sulorartartut holdikkaarnermi bronzennanniunneq ukiormanna naammagiinnartariaqarpaat. Tamanna paasinarsivoq semifinale-mi Jersey-mut 3-0-mik ajorsarnerup kingorna.
Allattoq Noah Mølgaard
juunip 27-at 2011 09:32
Kalaallit bronzennanniunnermi unammisussanngorpaat semifinalep aappaani Savalimmiormiut Guernsey-llu ajorsartui.
Kalaallit ataasiakkaarnermi pikkorinnersatik unammisikkaluarpaat. Tassaapput Bror Madsen aamma Sara Lindskov Jacobsen, taakkuli tamarmik ajorsarput. Bronzennanniunnissarlu qularnarunnaarpoq angutit iligiiaarneranni Bror Madsen aamma Mads Nyvold ajorsarmata.
Arnat volleyballertartut ullumikkut ajorsaqqipput Saaremaa 3-0-mik ajorsarfigigamikku.
Arsaannermi unamminerit marluk ullumi kalaallit peqataaffigissavaat. Arnat arsaattartut Isle of Man unammissavaat nalunaaqutaq ataatsimut. Angutit arsaattartut nalunaaqutaq pingasunut unammissavaat Menorca. Unamminerit taakku marluk KNR radiokkut toqqaannartumik aallakaatinneqassapput.
